(ඥාණදාස රන්මුතු)
 
හික්කඩුව නගරසභාවේ, රත්ගම ප්‍රාදේශීය සභාවේ ඇතුළු ප්‍රාදේශීය සභා මන්ත්‍රීවරු පිරිසක්  ඉදිරිපිටදී විරෝධතා පුවරු අතැතිව අද(14) පෙරවරුවේ හෙන්නතොටදී උද්ඝෝෂණයක් පැවැත්වූහ.
 
හික්කඩුව නගර සභාවේ සභාපති විනී කාරියසම් මහතා ඇතුළු සේවක පිරිසක් පැමිණ හික්කඩුව නගර සභාවේ විපක්ෂ නායක මන්ත්‍රී ධම්මික ලාල්  මහතාගේ නිවසේ වැටක් බැකෝ යන්ත්‍රයක් යොදවා බලහත්කාරයෙන් කඩා දමා, මන්ත්‍රීවරයාට පහර දුන්නේ යැයි කියන සිද්ධියකට අදාළව ඔවුහු විරෝධය දැක්වූහ.
 
මෙම අවස්ථාවට සමගි බල වේගයේ රත්ගම සංවිධායක ආර්.පුෂ්පකුමාර, බද්දේගම  සංවිධායක බන්දුල ලාල් බන්ඩාරිගොඩ, කරන්දෙනිය සංවිධායක ජයන්ත ජයවීර, හික්කඩුව නගර සභාවේ මන්ත්‍රී සුගත් ලොකුගේ, රත්ගම ප්‍රාදේශීය සභා මන්ත්‍රීවරුන් වන දුලාජ් තරංග, ඩී.එම්.පරාක්‍රම යන මහත්වරු  සහ හිටපු ප්‍රාදේශීය සභා මන්ත්‍රීවරු පිරිසක් සහ ආධාරකරුවෝ පිරිසක් එක්ව සිටියහ.