සුරාසලක් කුට්ටිගලට ගෙන යාමට එරෙහිව විරෝධතාවක්

(අජිත්ලාල් ශාන්තඋදය සහ දාපනේ ජයන්ත නානායක්කාර)
 
ඇඹිලිපිටිය තුංකම නගරයේ පිහිටා ඇති සුරාසැලක්, කුට්ටිගල 42 ප‍්‍රදේශයට ගෙන යාමට විරෝධය පළ කරමින් ඇඹිලිපිටිය නෝනාගම ප‍්‍රධාන මාර්ගය හරස් කර කළු කොඩි ඔසවමින්  ජනතාව අද(19) විරෝධතාවක් පැවැත්වූහ.
 
මහා සංඝරත්නය, පළාත් පාලන ආයතන නියෝජිතවරු, ස්වේච්ඡා සංවිධාන නියෝජිතවරු, කාන්තාවෝ ඇතුළු 500ක් පමණ දෙනා විරෝධතාවට එක්ව සිටියහ.
 
පාරේ එක් මංතීරුවක් හෝ වාහන ගමනාගමනයට ඉඩ දෙන්නැයි පොලිසිය ඉල්ලා සිටි අතර, විරෝධතාකරුවන් පැවසුවේ සුරාසැල කුට්ටිගල  ප‍්‍රදේශයට ගෙන නොයන බවට සහතිකයක් දෙන තුරු ගමනාගමනයට ඉඩ නොදෙන බවය.
 
ඇඹිලිපිටිය ප‍්‍රාදේශීය ලේකම් ප‍්‍රසංග උදයකාන්ත මහතා එතැනට පැමිණි අතර ඉන් පසු මාර්ගයේ කොටසක් වාහන ගමනාගමනයට විවෘත කෙරිණි.
 
උද්ඝෝෂණයට එක්වූවන් අමතමින් ඔහු පැවසුවේ මෙම සුරාසල කුට්ටිගල 42 ප‍්‍රදේශයට ගෙනයාමට මහා සංඝරත්නය ද එකඟත්වය පළකර ඇති බවයි. පොලීසිය සහ ප‍්‍රාදේශීය ලේකම් කාර්යාලය ඊට අකමැති බවත් ගෙනයාමට ගත් තීරණය සම්බන්‍ධයෙන් නැවත විමර්ශනයක් පවත්වන ලෙස තමා සුරාබදු කොමසාරිස්වරයාගෙන් ඉල්ලා සිටි බවත් පැවසුවේය.
 
සුරාසැල කුට්ටිගල 42 ප‍්‍රදේශයට ගෙන යාම තාවකාලිකව නවත්වන ලෙස සුරාබදු කොමසාරිස්වරයා දුරකතන ඇමතුමක් දෙමින් නියෝග කළ බව උදයකාන්ත මහතා  කීවේය. උද්ඝෝෂකයන්ට ද ඒ බව දැන්වීය.
 
පැවති විරෝධතාව හේතුවෙන් මාර්ගයේ වාහන ගමනාගමනය පැය දෙකකට ආසන්න කාලයක් ඇණහිටිනි.