(කාංචන කුමාර ආරියදාස)

සෆාරි සඳහා යොදවා සිටි හීලෑ අලියකු අද (17) හිටිහැටියේ මියගොස් ඇතැයි සීගිරිය වනජීවී නිලධාරීහු පවසති.

සිගිරිය ප්‍රදේශයේ අලි සෆාරි සංචාර තුනක් අද දිනයේ මෙම අලියා විසින් සිදුකර තිබෙන බවත් හතරවෙනි සංචාරකයන් පිරිස පිට මත  තබා ගමන් ආරම්භ කර මද දුරක් යනවිට එකවර අලියා ගමන නවතා තිබෙන බවත් අලියාට යම්කිසි රෝගයක් හටගෙන ඇති බව වටහා ගත් ඇත්ගොව්වා නැවතත් සංචාරකයන් අලියා පිටින් බස්සවා මද වේලාවකට පසු අලියා මියගොස් ඇතැයි වනජීවී නිලධාරීන් කියති.

මෙසේ මිය ගොස් ඇත්තේ පල්ලෙබැද්ද රත්නපුර ප්‍රදේශයේ හිමිකරුවෙකුට අයත් වාසනා නමැති වයස අවුරුදු දහ අටක් පමණ වන පිරිමි අලියෙකු බව සීගිරිය වනජීවී නිලධාරීන් පවසති.

මෙම සිද්ධිය වූ ස්ථානයට පැමිණි සීගිරිය අඩවි වනසත්ව අඩවි ආරක්ෂක චන්ද්‍රා බණ්ඩාරනායක මහතා කියාසිටියේ හීලෑ අලින් පිළිබඳව නිරන්තරයෙන් වනජීවී නිලධාරීන් දැනුවත් කළයුතු බවත් පසුගිය කාල සීමාව තුළ මෙම අලියා මෙම සෆාරි භූමියේ නොසිටි බවත් අලියා නැවත සෆාරි ස්ථානයට රැගෙන ආ බව තමාව දැනුවත් නොකළ බවත් සඳහන් කළේය.