(හිරාන් ප්‍රියංකර ජයසිංහ)

නවගත්තේගම මහපිටියඇළයාය ප්‍රදේශයේ කුඹුරුයායක වෙඩි වැදී බරපතල තුවාල ලබා සිටි ඇතෙකු බේරා ගැනීම සඳහා අද (27) වනජීවි නිලධාරීන් පිරිසක්  බලවත් උත්සාහයක නිරතවූහ.

ඇළයාය කුඹුරක වැටී සිටි මෙම ඇතා පිළිබඳව ප්‍රදේශවාසීන් නවගත්තේගම වනජීවි නිලධාරීන් දැනුවත් කර තිබුණි.

වන ජීවි නිලධාරීන් එම ස්ථානයට ළඟා වන විටත් දැඩි ලෙස මෙම ඇතා අසාධ්‍ය මට්ටමක සිටි බව වනජීවි නිලධාරීහු පැවැසූහ.

අඩි අටකට වඩා උසකින් යුත් මෙම ඇතා වයස අවුරුදු 35 කට ආසන්න බවද ඔවුහු කියති.

වනජීවි පශු වෛද්‍ය ඉසුරු කොට්ටේගොඩ මහතා පවසා සිටයේ ඇතාගේ හිස ආසන්නයට දරුණු වෙඩි පහරවල් කිපයක් වැදීම නිසා හිස එසවිම නොහැකි මට්ටමක පැවතීම හේතුවෙන් ඇතා බේරා ගැනීමට විශාල උත්සහයක් ගන්නා බවයි.

සුසුම්නාවට හානි වීම නිසා ඇතා යළි නැගි සිටුවීමේදී අවදානම් තත්වයක් මතුව ඇති බවත් ඔහු පැවසීය.