(ඔගස්ටින් ප්‍රනාන්දු)     

වර්ෂාව හේතුවෙන් එකතු වූ ජලය නිසි අයුරින් ජලය ගලා යාමට තිබෙන ඇළ මාර්ගය අවහිර වීම හේතුවෙන් හලාවත මාදම්පේ දකුණු ඉරට්ටකුලම ප්‍රදේශවාසීහු දැඩි අපහසුතාවයට පත්ව සිටිති.

මාදම්පේ තිනිපිටිය වැවෙන් පිටාර ගලා යන ජලය සහ වැසි ජලය පැරණි ඕලන්ද ඇල හරහා මහ මුහුදට ගලා ගිය නමුත් මේ වන විට එම ජලය ගලා යන ඇල මාර්ගය අවහිර වීම හේතුවෙන් ප්‍රදේශයේ ජනතාව දැඩි අපහසුතාවයකට ලක්ව තිබේ.

ඉරට්ටකුලම ප්‍රැන්සිස් මාවතේ වෙසෙන පවුල් 40 ක් පමණ මෙම ගැටළුවට මුහුණ පා සිටිති.

මේ හේතුවෙන් සෞඛ්‍ය ගැටලු රැසකටද මුහුණ දීමට සිදුව ඇති බව ඉරට්ටකුලම ප්‍රදේශවාසීහු කියති.

මේ සම්බන්ධයෙන් නිසි විසඳුමක් ලබාදෙන ලෙස ඉල්ලා සිටියත් වගකිව යුතු කිසිම ආයතනයක් අවශ්‍ය පියවර ගෙන නොමැති බවද ඔවුහු කියති.

ඉරට්ටකුලම ජනතාවගේ ගැටළුව තමන් වෙත ද දන්වා ඇති බවත් මෙම ඇල මාර්ගය කොළඹ හලාවත මාර්ගය හරහා යා යුතු බවත් මේ වන විට ඊට යොදා ඇති බෝක්කුව ප්‍රමාණවත් නොවීම හේතුවෙන් එය පුළුල් කරන ලෙස තමන් මාර්ග සංවර්ධන අධිකාරියෙන් ඉල්ලා ඇති බවත් පුත්තලගම දිස්ත්‍රික් ආපදා කළමනාකරණ ඒකකයේ සහකාර අධ්‍යක්ෂ රංජිත් අලහකෝන් මහතා පැවසීය.