(තුසිත කුමාර ද සිල්වා) 

පළාත් අටක, දිස්ත්‍රික්ක14කට දින කිහිපයක් තිස්සේ බලපෑ අධික සුළං සහ වැසි තත්ත්වය හේතුවෙන් පවුල් 1214ට  අයත් පුද්ගලයන් 4918 දෙනෙකු පීඩාවට පත්ව පුද්ගලයන් 8 දෙනෙකු තුවාල ලබා ඇති බව ආපදා කළමනාකරණ මධ්‍යස්ථානය සඳහන් කරයි.

ඇතිවූ ගස් කඩා වැටීම් , දැඩි සුළං ඇතුළු ස්වභාවික ආපදා හේතුවෙන් නිවාස 1141 කට හානි වී ඇති අතර, ඉන් නිවාස 17ක් මුළුමනින්ම විනාශ වී තිබේ. කුඩා හා මධ්‍යම පරිමාණ ව්‍යාපාරික ස්ථාන 71 ක් ද  විනාශ වී ඇති බවද ආපදා කළමනාකරණ මධ්‍යස්ථානය කියයි.

මෙම වැසි සහිත අධික  සුළං තත්ත්වය හේතුවෙන් වැඩිම බලපෑමක් සිදුව ඇත්තේ බස්නාහිර  පළාතට අයත් කොළඹ, කළුතර සහ ගම්පහ යන දිස්ත්‍රික්කවලටය. එහි පවුල් 550 කට අයත් පුද්ගලයන් 2581 දෙනෙකු පීඩාවට පත්ව ඇත.

දින කිහිපයක් මුළුල්ලේ දිවයින අවට මුහුදු ප්‍රදේශ වලට බලපෑ දැඩි සුළං සහ වැසි තත්ත්වය ක්‍රමයෙන් පහව යනු ඇතැයි කාලගුණ විද්‍යා දෙපාර්තමේන්තුව සඳහන් කර තිබේ.

කෙසේ වෙතත් උතුර ,උතුරුමැද සහ වයඹ පළාත් වලත් ත්‍රිකුණාමලය සහ මාතලේ දිස්ත්‍රික්ක වලට සවස් කාලයේ පැයට කිලෝමීටර 50ක් 60ක් දක්වා ක්ෂණිකව සුළං ඇති විය හැකි බව එම දෙපාර්තමේන්තුව තවදුරටත් සඳහන් කරයි.

ප්‍රදේශ කිහිපයකට ඇදහැලුණු වර්ෂාව හේතුවෙන් මාර්ග කිහිපයක් යටවී ගමනාගමන අවහිරතා ඇති වී ඇති බවත් පහත් බිම් රැසක් ද ජලය යටවී තිබූ බවත් වාර්තා වේ.

මේ අතර කළුතර දිස්ත්‍රික්කයේ ද අද  (11) වන විට පැවති අධික වැසි සහිත කාලගුණික තත්ත්වය පහව ගොස් ඇතැයි ද ආපදා කලමනාකරණ මධ්‍යස්ථානයේ  කළුතර ඒකකය සඳහන් කරයි.