(හිඟුරානේ නවරත්න සමරතුංග)
 
අම්පාර කල්මුණ ප්‍රධාන මාර්ගයේ උදයපුර බෝගස අසල ප්‍රදේශයේදී අද (25) පෙරවරු 10.45ට පමණ වැලි ප්‍රවාහනය කරමින් තිබුණු ට්‍රක් රථයක් සහ යුද හමුදා සෙබළුන් ගමන් ගත් ට්‍රැක්ටරයක් මුහුණට මුහුණලා ගැටීමෙන් යුධ හමුදාවේ සාමාන්‍ය සෙබළුන් තිදෙනෙකු අම්පාර මහ රෝහලට ඇතුලත් කර ඇති බව අම්පාර පොලිසිය පවසයි.
 
අම්පාර නගරය දෙසින් කල්මුණේ දෙසට ගමන්කළ වැලි පැටවූ ට්‍රක්රථයක් සහ  කල්මුණ දෙසින් අම්පාර නගරය දෙසට පැමිණි ට්‍රැක්ටරයක් මෙසේ අනතුරට පත්ව ඇත.
 
අනතුර සිදුවන අවස්ථාවේ එම ලොරි රථයේ දකුණු පස  යතුරුපැදි දෙකක් සහ පාරේ ගමන් කල පුද්ගලයෙකුද ගැටී ඇත.
 
මෙම අනතුරින් මල්වත්ත යුධ හමුදා කඳවුරට අයත් ට්‍රැක්ටර් රථය දෙකට වෙන්ව ගොස් ඇති අතර එහි රියැදුරා ඇතුළු සෙබළුන් තිදෙනා රෝහල් ගතකර ඇත.
 
මේ අනතුර සම්බන්ධයෙන්  යුද හමුදාවේ වෙනම පරීක්ෂණයක් සිදු කෙරෙන බව එහි උසස් නිලධාරියෙක් පැවසීය.
 
අම්පාර කොට්ඨාශය බාර පොලිස් අධිකාරි ජයන්ත රත්නායක, පොලිස් රථවාහන අංශයේ ස්ථානාධිපති පොලිස් පරීක්ෂක විජේරත්න ඇතුළු පොලිස් නිලධාරීහු පරීක්ෂණ පවත්වති.