(පුෂ්පකුමාර මල්ලවආරච්චි) 

මත්ද්‍රව්‍ය ජාවාරමට සම්බන්ධ ප්‍රධාන පෙලේ සාමාජිකයෙකු විදේශීය රටක නිෂ්පාදිත රිවොල්වර් වර්ගයේ ගිනි අවියක් සමඟ අද (13) කිරිදිවැල මයිලවලාන ප්‍රදේශයේදී අත්අඩංගුවට ගත්බව බස්නාහිර පළාත් උතුර දිසා අපරාධ කොට්ඨාසය කියයි.

මයිලවලාන ප්‍රදේශයේ පදිංචිකරුවෙකු වන සැකකරු කළක් ගුවන් හමුදාවේ සේවය කර ඇති බවත් දැනට වැලිකඩ බන්ධනාගාරගතව සිටින හංවැල්ල ප්‍රදේශයේ පදිංචි තිලිණ නැමැති අපරාධකරුගේ හිතවතෙකු බවත් එම ඒකකයට තොරතුරු අනාවරණය කරගෙන තිබේ. 

මෙම සැකකරු තිලිණ නැමැති පාතාල කල්ලි නායකයා වෙනුවෙන් මෙම රිවෝලවරය රුපියල් ලක්ෂයකට මිලදී ගෙන ඇති බවද මූලික පරීක්ෂණවලදී හෙළිකරගෙන ඇත.

සැකකරු කිරිදිවැල ප‍්‍රදේශයේ මත්කුඩු බෙදා හැරීමේ යෙදී ඇතැයිද තිලිණ නැමැත්තා බන්ධනාගාරයේ සිට එවන ලද මුදලකින් සැකකරු රිවෝල්වරය සඳහා මුදල් ගෙවා ඇති බවද දිසා අපරාධ කොට්ඨාසය කියයි.

වරකාපොල, කිරිදිවැල, පිටකොටුව, ගනේමුල්ල ,අලව්ව සහ කෑගල්ල යන පොලිස් ස්ථාවල විභාග වන නඩු ගණනාවක සැකකරුවෙකු බවද එම ඒකකයේ නිලධාරියෙකු පැවසීය.

සැකකරු හෙට (14) පූගොඩ මහේස්ත‍්‍රාත් අධිකරණය වෙත ඉදිරිපත් කිරීමට නියමිතය.