යතුරුපැදියක් සොරා ගත් යුක්රේන ජාතිකයෙක් අත්අඩංගුවට
(ක්‍රිෂාන් ජීවක ජයරුක්)
වැලිගම මිරිස්ස ප්‍රදේශයේ හෝටල් හිමියකුට අයත් රුපියල් ලක්ෂයක් පමණ වටිනා යතුරු පැදියක් සොරකම් කළ බව කියන යුක්රේන ජාතිකයකු සැකපිට අත්අඩංගුවට ගත් බව වැලිගම මූලස්ථාන පොලීසිය පවසයි.
අදාළ හෝටල් හිමියාගේ නිවස ඉදිරිපිට නවතා තිබු යතුරුපැදිය ඔහු සොරකම් කර ගෙන ගොස් තිබුණේ ඉකුත් 2 වැනිදාය.
උදෑසන මිරිස්ස වරායට යාම සදහා යතුරුපැදිය සොයා බැලු විට නොතිබුණු බවත් සී.සී.ටී.වී.කැමරා පද්ධතිය පරික්ෂා කිරිමේදී විදේශීය ජාතිකයකු එය රැගෙන යන බව පටිගත වී තිබු බවත් එහි හිමිකරු පොලීසිය වෙත ප්‍රකාශ කර තිබේ.
තමා සංචාරක ව්‍යාපාරයේ නිරත අයෙකු නිසා එම විදේශීය ජාතිකයා නැවත යතුරුපැදිය ගෙනවිත් බාරදිය හැකි බවට වූ විශ්වාසයෙන් ඔහු පසු වී ඇත.
එහෙත් ඉන් දින පහකට පසු සැකකාර යුක්රේන ජාතිකයා මිරිස්ස නගරයේ දී එම යතුරුපැදියෙන් ගමන් කරමින් සිටින විට පොලීසිය නවතා පරික්ෂා කර තිබේ.
වලංගු ආදායම් බලපත්‍රය හා රක්ෂණ සහතික පරික්ෂා කරන විට අදාළ යතුරුපැදිය සොරකම් කර ගෙනවිත් ඇති බව හෙළි වී ඇත.
සැකකාර යුක්රේන ජාතිකයා මාතර මහේස්ත්‍රාත් අධිකරණයට ඉදිරිපත් කිරීමට නියමිතය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
