(කාංචන කුමාර ආරියදාස)
මොරගහකන්ද ජලාශය ඉදිකිරීම  සඳහා  පවරාගත් ඉඩම් වල පැවති රජයේ ගොඩනැගිලිවල තිබූ ගොඩනැගිලි ද්‍රව්‍ය  සංවිධානාත්මක පිරිසක්  විසින් සොරකම්  කරගෙනයාමේ සිද්ධින් පිළිබඳව කිහිප වරක්  තොරතුරු ලැබී ඇතැයි මොරගහකන්ද-කළුගඟ ජලාශ ව්‍යාපෘතියේ   වැඩබලන  ව්‍යාපෘති අධ්‍යක්ෂක මහින්ද ජයසිංහ මහතා පැවසීය.

නාඋල ප්‍රාදේශීය ලේකම් කොට්ඨාසයට අයත් කෝන්ගහවෙල ප්‍රදේශයේ  පිහිටා තිබූ ගොවිජන සේවා මධ්‍යස්ථාන, රෝහල්  ගොඩනැගිලි,  රෝහල් නේවාසික ගොඩනැගිලි ආදී  ගොඩනැඟිලි රැසක ලී දඬු, ජනෙල්,  උළුවහු ඇස්බැස්ටෝස් සීට්,  උලු මෙන්ම ඒවායේ තිබූ විවිධ  ද්‍රව්‍යද මේ වන විට එම පිරිස් විසින් සොරකම්කරගෙන ගොස්  ඇත.
 
මෙම වටිනා ගොඩනැගිලි ද්‍රව්‍ය  තවත් සමාජ සත්කාරයන් සහ රජයේ ඉදිකිරීම් සඳහා යොදාගැනීමට හැකි ඒවා බවත් මේවා දැනටමත් ඉතිරිවී තිබෙන ටික හෝ ආරක්ෂා කර පොදු මහජනතාවගේ සුබ සිද්ධිය සඳහා යොදා ගැනීමට හැකියාව තිබෙන  බව ගැමියෝ පෙන්වා  දෙති.
 
 අතහැර දැමූ ගොඩනැගිලිවල වටිනා ද්‍රව්‍ය ඉවත් කරගන්නා  ලෙස ශ්‍රී ලංකා මහවැලි අධිකාරිය මගින් දැනුම් දී ඇතත් අදාල ආයතන මගින් ඒවා  මෙතෙක් සිදු  කර නැති බවද  මහවැලි නිලධාරීහු සඳහන් කරති.
 
කෝන්ගහවෙල ප්‍රදේශයේ රෝහලේ සහ වෛද්‍ය නේවාසිකාගාරවල කොටස් රාශියක්  යම් පිරිසක් විසින් ගලවාගෙන ගොස් ඇති අයුරු දකින්නට තිබේ.  
 
මේ පිළිබඳව  මොරගහකන්ද හා  කලුගග  ජලාශ ව්‍යාපෘතියේ  වැඩබලන  ව්‍යාපෘති අධ්‍යක්ෂක මහින්ද ජයසිංහ මහතාගෙන් විමසීමේදී කියා සිටියේ මෙම ගොඩනැගිලි ද්‍රව්‍ය කඩිනමින් ඉවත් කිරීමට  අවශ්‍ය උපදෙස් ලබා දී තිබෙන බවයි.  එසේම අදාළ අමාත්‍යාංශ සහ රජයේ නිලධාරීන් විසින් රැගෙන නොයන්නේ නම් මහවැලි නිලධාරීන් යොදවා ඒවා ඉවත් කිරීමට අවශ්‍ය පියවර ගන්නා බවද හෙතෙම සඳහන් කළේය.