(රොහාන් කුමාර දිසානායක)
 
තම මාමණ්ඩියට කිරිච්චියකින් 13වරක් ඇන ඝාතනය කළ පුද්ගලයකුට කෑගල්ල මහ අධිකරණ විනිසුරු නාමල් බණ්ඩාර බලල්ලේ මහතා අද (06) මරණ දඬුවම ලබාදීමට නියෝග කළේය.

මරණදඩුවම නියම කෙරුණේ නිකපිටිය බුලත්කොහුපිටිය පදිංචි පතිරැන්නැහැලාගේ නිමල් වීරසිංහ නැමති 55 හැවිරිදි දෙදරු පියෙකි.
 
සිද්ධියෙන් පසුව මේ වනතෙක් බිරිඳ අතුරුදන්ව ඇති අතර දරුවන් දෙදෙනා ඥාතීන් විසින් හදාවඩාගෙන ඇත.

පෞද්ගලික ආරවුලකට මාමණ්ඩිය සමග බහින්බස් වීමකින් සැකකරු මෙම ඝාතනය කර ඇත.
 
තුවාලකරු කැගල්ල මහ රෝහලට ඇතුළත් කිරීමෙන් පසුව මියගොස් ඇති අතර සිද්ධිය සම්බන්ධයෙන් සැකකාර බෑනා අත්අඩංගුවට ගෙන කෑගල්ල මහේස්ත්‍රාත්වරයා වෙත ඉදිරිපත් කිරීමෙන් පසුව ලගු නොවන විභාගයක් පවත්වා නීතිපතිවරයා වෙත ඉදිරිපත් කෙරිණි.

නීතිපතිවරයා විසින් සැකකරුට විරුද්ධව අධි චෝදනා ගොනුකර කෑගල්ල මහ අධිකරණයේ නඩු පවරණු ලැබිණි. දීර්ඝ නඩු විභාගයකින් පසුව කෑගල්ල මහ අධිකරණ විනිසුරු නාමල් බණ්ඩාර බලල්ලේ මහතා ඉදිරිපත් වූ සාක්ෂි අනුව විත්තිකරුට මරණදඬුවම නියම කළේය.