(රංජිත් රාජපක්ෂ)                      

නාවලපිටිය දිස්ත්‍රික් මහ රෝහලේදි සිසේරියන් සැත්කමකින් බිහි කළ බිලිඳකු රෝහලේ අත්හැර දමා මව අතුරුදහන්වීම සම්බන්ධයෙන් පරීක්ෂණ අරඹා ඇතැයි නාවලපිටිය පොලිසිය  කියයි.
 
ඉකුත් මස 31 වෙනි දින උදරයේ අමාරුවක් බව පවසමින් නාවලපිටිය කඩියන්ලෙන ප්‍රදේශයේ පදිංචි ලිපිනයක් සහිත දෙදරු මවක් නාවලපිටිය දිස්ත්‍රික් මහ රෝහල වෙත ඇතුළත් වී තිබේ.
 
රෝහලට ඇතුළත් වු  කාන්තාව ස්කෑන් පරීක්ෂාවකට ලක් කිරීමේදී එම කාන්තාව  දරු ප්‍රසූතියකට ආසන්නව සිටින බව තහවුරු කර ගත් වෛද්‍යවරුන් මෙමස 1 දින සිසේරියන් සැත්කමකින් ඇගේ කුසේ සිටි සිගිත්තිය රැගෙන මව වෙත භාර දී ඇත. සිගිත්තිය අයහපත් ශරීර සෞඛ්‍යයෙන් සිටි නිසා වෛද්‍යයවරුන් විසින් නාවලපිටිය දිස්ත්‍රික් මහ රෝහලේ නොමේරු ළදරු ඒකකය වෙත ඇතුළත් කර තිබේ.
 
සිගිත්තයගේ මව දෙදරු මවක් බවත්, දරු ප්‍රසුතියෙන් පසු ඇය ඉකුත් 6 වැනි  දින බැංකුවෙන් ඉල්ලුම් කර  තිබු ණය මුදලක් රෝහලෙන් බැහැරව යාමට අවසර ඉල්ලා රොහල් බලධාරීන්ට ලිපියක් භාරදී රෝහලෙන් බැහැරව ගිය නමුත්  යළිත් රෝහලට නොපැමිණි බව  නාවලපිටිය දිස්ත්‍රික් මහ  රෝහලේ වෛද්‍යවරු පැවසූහ.
 
කාන්තාව රෝහළට ඇතුළත්වීමේදි ඇය විසින් ලබාදුන් ලිපිනය පිළිබදව නාවලපිටිය දිස්ත්‍රික් මහ රොහල් පොලිසිය විසින් කළ  සොයා බැලිමකදී එම කාන්තාව කුලී පදනම මත එම නිවසේ පදිංචිව සිට පසුව එම ලිපිනය හැර ගොස් ඇති බවටද පොලිසියට තහවුරු වී ඇත.
 
එම මව සොයා නාවලපිටිය පොලිසිය අංශ කිහිපයක් ඔස්සේ පරීක්ෂණ පවත්වයි.