(පාලිත ආරියවංශ)

බදුල්ල මළංගමුව අමුණක තිබී  හමුවූ මළ සිරුර  පස්සර කනවරැල්ල වත්තේ පදිංචි  විජයන් තසදරන් (22) නමැත්තාගේ බව පවුලේ ඥාතීන් විසින් අද (23) දා හඳුනාගත් බව බදුල්ල පොලිසිය  පවසයි.

රඹුක්පොත ඔයෙන් ජලය ගලායන  මළංගමුව  අමුණේ   හිරවී තිබු මළ සිරුර  එම ස්ථානයට නෑමට ගිය  පුද්ගලයෙකු මුලින්ම දැක  ඇති බවත් එය බෙහෙවින්ම නරක් වී තිබූ බවත් පොලිසිය සඳහන් කළේය.
 
දින කිපයකට පෙර මෙම මරණය සිදුවන්නට ඇතැයි පොලිසිය සැක පළකළේය. මේ අභිරහස් මරණය පිළිබඳව මහේස්ත්‍රාත් පරීක්ෂණය බදුල්ල වැඩබලන මහේස්ත්‍රාත් ආනන්ද මොරගොඩ මහතා විසින් අද (23) සිදුකළේය.
 
මෘත දේහය බදුල්ල මහරොහ‍ලේ අධිකරණ විශේෂඥ වෛද්‍යවරයා වෙත යොමු කර පශ්චාත් මරණ පරීක්ෂණයකට ලක් කරන ලෙසත් වැඩිදුර විමර්ශන සිදුකරන ලෙසත් වැඩබලන මහේස්ත්‍රාත් වරයා බදුල්ල පොලිසියට නියෝග කළේය.