(ඔගස්ටින් ප්‍රනාන්දු)

මාරවිල නගරයේ දී පොලිස් වෙඩි පහරකින් මියගිය තරුණයාගේ මරණය සැලසුම් සහගත ලෙස පොලිසිය විසින් සිදුකර ඇතැයි කියමින් හලාවත මුගුණුවටන ප්‍රදේශයේ පිරිසක් අද (8) විරෝධතාවක නිරත වූහ.

මෙසේ මිය ගොස් තිබුණේ මුගුණුවටවන කොහොඹවත්තේ පදිංචිව සිටි ඇම්.ඒ අජිත් ප්‍රසන්න නැමැති 31 හැවිරිදි තරුණයෙකි.

මාරවිල නගරයේදී පසුගිය 5 වන දින රාත්‍රී පොලිස් වෙඩි පහරකින් බරපතල තුවාල ලබා මාරාවිල මූලික රෝහලට ඇතුළත් කර සිටියදී මෙම තරුණයා මියගොස් ඇති බව පොලිසිය ප්‍රකාශ කර තිබුණි.

මිය ගිය තරුණයාගේ සිරුර සම්බන්ධයෙන් අවසන් කටයුතු අද (8) මුගුණුවටවන පොදු සුසාන භූමියේ දී සිදු කෙ‍රුණි.

තරුණයාගේ දේහය සුසාන භූමිය කරා රැගෙන එන අවස්ථාවේදී පිරිසක් මෙම මරණය සැලසුම් සහගත ලෙස සිදුකළ මනුෂ්‍ය ඝාතනයක් බව කියමින් මේ සම්බන්ධයෙන් වහාම පරීක්ෂණයක් පවත්වන ලෙස ඉල්ලමින් පොලිසි‍යට විරෝධය පලකර විරෝධතාවක නිරත වූහ.

මෙම මෘත ශරීරය සම්බන්ධයෙන් අවසන් කටයුතු සිදුකරන අවස්ථාවේ දී කිසිඳු අකාරයක විරෝධතාවක් නොපවත්වන ලෙසට හලාවත පොලිසියේ ඉල්ලීම මත හලාවත මහේස්ත්‍රාත් අධිකරණය නියෝගයක් ද නිකුත් කර තිබුණි.