(ඩබ්ලිව්.ඒ. අසේල)
 
පාත හේවාහැට  ප්‍රාදේශීය සභාවේ නව සභාපති ලෙස ශ්‍රී ලංකා පොදුජන පෙරමුණේ වයි. එම්. රණසිංහ යාපා බණ්ඩාර මහතා අද (28) පෙරවරුවේ  පැවති ඡන්ද වීමසීමේදි තේරී පත්විය.
 
පාත හේවාහැට ප්‍රාදේශීය සභාවේ පුරප්පාඩුව පැවති සභාපති තනතුර සඳහා මධ්‍යම  පළාතේ පළාත් පාලන කොමසාරිස්ගේ ප්‍රධානත්වයෙන් එම සභාවේදි අද ඡන්ද විමසීමක් පැවැත්වුණි.
 
සභාපති තනතුර සඳහා ශ්‍රී ලංකා පොදුජන පෙරමුණේ වයි.එම්. රණසිංහ යාපා බණ්ඩාර මහතාත් එක්සත් ජනතා නිදහස් සන්ධානයේ අමිල අමරසිංහ හා ස්වාධීන කණ්ඩායමේ කේ.එස්.බි. රාජනායක යන අයගේ නම් යෝජනා විය.
 
එහිදි අමිල අමරසිංහ මහතා  තමා  ඡන්දයට ඉදිරිපත් වීමෙන් ඉල්ලා අස්වෙන බව ප්‍රකාශ කළේය. අනුව විවෘත ඡන්ද වීමසීමක් පැවති අතර එහිදි ඡන්ද 23ක් ලබා ගත්  වයි. එම්. රණසිංහ යාපා බණ්ඩාර මහතා සභාපති ලෙස තේරී පත්විය. මන්ත්‍රී ධුර 41 ක් හිමි සභාවේ ශ්‍රී ලංකා පොදුජන පෙරමුණ හා එක්සත් ජනතා නිදහස් සන්ධානය එක්ව යාපා බණ්ඩාර මහතාට ඡන්දය ලබා දුන් අතර එක්සත් ජාතික පක්ෂය ශ්‍රී ලංකා මහජන කොංග්‍රසය හා ස්වාධීන  කණ්ඩායම කේ.එස්.බි. රාජනායක මහතාට ඡන්දය දෙනු ලැබීය.
 
ජනතා විමුක්ති පෙරමුණේ මන්ත්‍රීවරයා ඡන්දය පාවිච්චි කිරීම සඳහා පැමිණ සිටයේ නැත.