(දිනේෂ් උපේන්ද්‍ර)                                                                                  

පන්නල බම්මන්න ප‍්‍රදේශයේ දී යුද හමුදාව හා පොලිසිය විසින් සොයා ගත් ඇමෝනියා තොගයේ හිමිකරු බවට සැකපිට අත්අඩංගුවට ගෙන තිබූ සැකකරු කුලියාපිටිය අධිකරණයට ඉදිරිපත් කිරීමෙන් පසුව මේ මස 30 දක්වා රක්‍ෂිත බන්ධනාගාර ගත කරන ලෙස කුලියාපිටිය මහේස්ත‍්‍රාත් ජනනි එස් විජේතුංග මහත්මිය අද (24) නියම කළාය.

එලෙස රක්‍ෂිත බන්ධනාගාර ගත වූයේ පන්නල යක්විල ප‍්‍රදේශයේ පදිංචි මොහොමඩ් ජුනයින් මොහොමඩ් රිස්වි නැමැත්තෙකි.

සැකකරු වෙනුවෙන් පෙනී සිටි නීතිඥයින් අධිකරණය හමුවේ කරුණු කියමින් පෙන්වා දුන්නේ සැකකරු මීට මාස කිහිපයකට ඉහත දී අදාළ සැක සහිත මලු තොගය තිබූ ඉඩම විකුණා ඇති බවත් එම ඉඩමේ නව ගැණුම්කරු සිටියදී මුල් හිමිකරු මෙලෙස අත්අඩංගුවට ගෙන තිබීම අසාධාරණ බවත් ය.

පොලිසිය අදාළ කරුණු බැහැර කරමින් කියාසිටියේ සැකකරු සම්බන්ධව මේ වනවිටත් විමර්ශනය සිදුකරමින් පවතිනබවත් එවන් දේපල ගනුදෙනුවක් සම්බන්ධව පොලිසියේ දැනුවත් භාවයක් නොමැති බවත්ය. මෙන්ම යුද හමුදාව හා පොලිසිය එක්ව කළ මෙම වැටලීමේදී අදාළ ඇමෝනියා තොගය සොයා ගෙන තිබූ බවද පොලිසිය කරුණු ඉදිරිපත් කළේය.

ඊට පිළිතුරු දුන් සැකකරු වෙනුවෙන් පෙනී සිටි නීතිඥයින් නැවත පෙන්වා දුන්නේ පොලිසිය රක්‍ෂිත බන්ධනාගාර ගතකිරීමට ඉල්ලා සිටින්නේ මෙම සිදුවීම හා කිසිසේත් සම්බන්ධයක් නොමැති සැකකරුවෙක් බවත් අදාළ ගබඩාව හිමි ඉඩමේ නියම සැකකරු ද අධිකරණයේ ද පෙනී සිටින බවත් ය.

කරුණු පිළිබඳ අවධානය යොමු කළ මහේස්ත‍්‍රාත්වරිය එළැඹෙන නඩු වාරයේදී සැකකරු පිළිබඳ හා ඉදිරිපත්වූ කරුණු පිළිබඳ සොයා බලා සවිස්තර වාර්තාවක් ඉදිරිපත් කිරීමට නියම කරමින් සැකකරු වෙනුවෙන් කළ ඇප අයැදුම ඉවත දමා මේ මස 30 දක්වා රක්‍ෂිත බන්ධානාගාරගත කළේය.