( ඩී.කේ.රත්න )
හාලිඇල ඇටම්පිටිය නෙලූව මංසන්ධියේදී තේ දලු ප‍්‍රවාහනය කළ ලොරි රථයක් අද (23) රදම් කරත්තයක ගැටී රදම් කරත්තය පෙරළීයාමෙන් පුද්ගලයකු මිය ගොස් තවත්  දෙදෙනෙකු බරපතල තුවාල ලබා ඇටම්පිටිය රෝහලට ඇතුලත් කර ඇතැයි ඇටම්පිටිය පොලීසිය පවසයි.
 

මෙම අනතුරින් හාලිඇල නෙලූව මංසන්ධිය අසළ  පදිංචි මුත්තයියා ජයශංකර් නැමති පනස් හැවිරිදි පුද්ගලයෙකු මියගොස් තවත් දෙදෙනෙකු බරපතල තුවාල ලබා ඇටම්පිටිය රෝහලට ඇතුළත් කර ඇත.
 
නෙලූව හින්දු කෝවිලේ අද දහවල් රදම් පෙරහැර පැවති අතර එම පෙරහැරට සහභාගී වූ රදම් කරත්තයක් නෙලූව මංසන්ධියට පැමිණෙන විට නෙලූව හාලිඇල මාර්ගයේ ධාවනය වූ තේ දලු ප‍්‍රවාහනය කරමින් තිබූ ලොරි රථයක් මෙම කරත්තයේ ගැටීම නිසා මෙම අනතුර සිදුවී ඇතැයි ඇටම්පිටිය පොලීසිය පවසයි.
 
මෙම අනතුරට සම්බන්ධ ලොරි රථයේ රියදුරු ඇටම්පිටිය පොලීසිය මගින් අත්අඩංගුවට ගෙන තිබේ.