(හේමලතා ඩී හේවගේ)   
                                          
පන්නල නගරයට බලපෑ ටොනාඩෝ තත්වය හේතුවෙන් පන්නල ප්‍රාදේශීය ලේකම් කොට්ඨාසයට අයත් ග්‍රාම සේවා වසම් 4ක නිවාස 50ක්, ව්‍යාපාරික ස්ථාන 65ක්, රථවාහන 5ක්, පන්නල රෝහල, සතිපොළ ඇතුළු ස්ථාන කිහිපයකට අලාභ හානි සිදුව ඇතැයි පන්නල ප්‍රාදේශීය ලේකම් සමන්ත වික්‍රමරත්න බණ්ඩාර මහතා පැවසීය.
 
අධික වර්ෂාවත් සමග ඇති වූ කුණාටු තත්වයෙන් මාකදුර ඉහළ, මකදුර පහළ, හෙන්ඩිගල සහ පන්වල කුඹුර යන ග්‍රාම සේවා වසම් හතරෙහි ජනතාව පීඩාවට පත්ව ඇතැයිද, පන්වල කුඹුර ග්‍රාමයේ නිවාස කිහිපයක් මතට විශාල ගස් කඩා වැටී ඇතැයිද ඒ මහතා කීය.
 
හානි සිදුව ඇති නිවාස සහ ව්‍යාපාරික ස්ථානවලට ආපදා කළමණාකරන අමාත්‍යංශයේ රක්ෂණ භාර අරමුදල මගින් රුපියල් 25,000ක පමණ වන්දි මුදල් ලබාදීමටත්, රුපියල් 10,000කට වඩා අඩු හානි සිදුවූ ස්ථාන සඳහා ආපදා කළමණාකරන අමාත්‍යංශ  මගින් කඩිනමින් මුදල් ලබාදීමටත් අවශ්‍ය තොරතුරු මේවනවිට සකස් කරන බවද ප‍්‍රාදේශීය ලේකම්වරයා වැඩිදුරටත් පැවසීය. 
                                               
මාකඳුර සතිපොළට රුපියල් ලක්ෂ 30කට වැඩි හානියක් හා කොම්පෝස්ට් අංගනයට රුපියල් ලක්ෂ 50කට වැඩි හානියක් සිදුව ඇති බවත්, නගරයේ කැඞී බිඳී ගිය ස්ථානවල සුන්බුන් ඉවත්කර පිරිසිදු කිරීම සඳහා සභාවේ සේවකයන් යොදවා ඇති බවත් පන්නල ප‍්‍රාදේශීය සභාවේ සභාපති රංජිත් ලංසක්කාර මහතා පැවසීය.                                                                        
සඳලංකාව දිසා රෝහලේ වෛද්‍ය ඩී. පී. රණසිංහ මහතා පැවසුවේ රෝහලේ භික්ෂු වාට්ටුවට හා තවත් ගොඩනැගිලි කිහිපයක වහලවලට සුළගින් හානි සිදුව ඇතිබවය.          
                                 
මාකඳුර නගරයේ ව්‍යාපාරික ස්ථාන විශාල ප‍්‍රමාණයකට මෙම සුළගින් හානි සිදුව ඇති බවත් අලාභය මෙතැකැයි ගණන් බැලීමට නොහැකි බවත් මාකඳුර එක්සත් වෙළඳ සංගමයේ භාණ්ඩාගාරික නිමල් මහතාද පැවසීය.