(අනීෂා මානගේ)
 
බිල්පත් නොගෙවීම හේතුවෙන් ජල සැපයුම විසන්ධි කළ ජලසම්පාදන මණ්ඩලයේ තංගල්ල කාර්යාලයේ නිලධාරියෙකුට පහර දුන් බව කියන තරුණයකු අද(11) අත්අඩංගුවට ගත් බව තංගල්ල මූලස්ථාන පොලිසියේ අපරාධ අංශයේ නිලධාරීහු පවසති.
 
මෙලෙස අත්අඩංගුවට පත්ව ඇත්තේ තංගල්ල ඉඳිපොකුණගොඩ ප්‍රදේශයේ පදිංචි 19 හැවිරිදි තරුණයෙකි.
 
නියමිත පරිදි ජල බිල්පත් නොගෙවූ තංගල්ල මාරකොල්ලිය ප්‍රදේශයේ නිවෙස්වල ජලය විසන්ධි කිරීමට ජලසම්පාදන මණ්ඩලයේ තංගල්ල කාර්යාලයේ නිලධාරියෙකු පසුගියදා ඒම ප්‍රදේශවලට ගොස් තිබිණි. ඔහු තම රාජකාරී කටයුතු නිමකර ඊයේ(10) නිවෙස බලා ගමන් කරමින් සිටියදී තංගල්ල නගරයේදී කිසියම් පුද්ගලයන් දෙදෙනෙකු පහරදුන් බව එම නිලධාරියා තංගල්ල මූලස්ථාන පොලිසියට පැමිණිලි කර තිබිණි.
 
සිද්ධිය පිළිබඳව විමර්ශන සිදුකළ තංගල්ල මූලස්ථාන පොලිස් ස්ථානයේ නිලධාරීන් තංගල්ල බස් නැවතුම්පොළෙහි සීසීටීවී කැමරා දර්ශන පරීක්ෂා කර සැකකරුවන් දෙදෙනකු හඳනාගැනීමට සමත්වූ අතර එයින් එක් අයෙකු අද(11) අත්අඩංගුවට ගෙන තිබිණි.
 
ජල සැපයුම විසන්ධි කිරීම හේතුවෙන් කෝප වූ තරුණයන් ජල සම්පාදන මණ්ඩලයේ නිලධාරියාට පහර දුන් බවට පොලිසිය සැකකරයි. 
 
හඳුනාගත් එක් තරුණයෙකු තංගල්ල මාරකොල්ලිය ප්‍රදේශයේ පදිංචිකරුවෙකු බවද පහරකෑමට ලක්වූ නිලධාරියා එම තරුණයාගේ නිවෙසෙහි ජල සැපයුම විසන්ධි කර ඇති බවද පොලිසිය කියයි. 
 
අනෙකු සැකකරු අත්අඩංගුවට ගැනීමට පොලිස් නිලධාරීහු වැඩිදුරටත් පරීක්ෂණ පවත්වති.