( ජී.ඩබ්ලිව් කේ ප්‍රේමතිලක ද සිල්වා සහ ගාමිණී මහදුර)
 
රජය සතුව තිබූ ගින්තොට තුනී ලෑලි සංස්ථාවට අයත් අක්කර දාහතක් පෞද්ගලික අංශයට විකුණා දැමීම එරෙහිව සහ එම  ඉඩම නැවතත් රජයට පවරා ගන්නා ලෙස ඉල්ලමින් ප්‍රදේශයේ ස්වාමීන් වහන්සේලා පෝද්දල ප්‍රාදේශීය සභා මන්ත්‍රී වරුන් හිටපු පළාත් සභා මන්ත්‍රීවරුන් ඇතුළු මහා ජනතාව ගිංතොට තුනීලෑලි භූමිය ඉදිරිපිට දී අද (27) දැවැන්ත විරෝධතාවක නිරත වූහ.
 
ගිංතොට තුනීලෑලි සංස්ථාව සුරැකීමේ එකමුතුව විසින් මෙම විරෝධතාව සංවිධානය කර තිබිණි .විරෝධතා කරුවන්  තව දුරටත් කියා සිටියේ දැනට සක්‍රීය  තත්වයේ  පවතින ගිංතොට තුලී ලෑලි කම්මලේ 200 පමණ වන  සේවකයන්ගේ රැකියා සුරක්ෂිත භාවයට ද මෙමඟින් හානි වන බවයි.
 
එම නිසා විරෝධතා කරුවන් ඉල්ලා සිටියේ මෙම ව්‍යාපාරය හා ඊට අයත් ඉඩම නැවතත් රජයට පවරා ගෙන කටයුතු කරන ලෙසයි.මෙම විරෝධතාවයට බද්දේගම සමිත, උක් වත්තේ   චන්දිම,උළුවිටිකේ සෝමරතන, තංගල්ලේ අනුරුද්ධ,අම්බලන්ගොඩ සුමේධානන්ද,බෙලි අත්තේ සුනීත යන නායක හිමිවරුන්,බෝපෙ පෝද්දල ප්‍රාදේශීය සභා සභාපති දිල්රුක්  අබේකෝන්, ප්‍රාදේශීය සභා මන්ත්‍රීවරුන් වන ගයාන් ගීතික ලියනගේ,සුගත් කලංසූරිය,ප්‍රේමලාල්  අබේසේකර    බී. කේ. ප්‍රියන්ත යන මහත්වරුන් ඇතුළු මන්ත්‍රීවරු ,හිටපු පළාත් සභා මන්ත්‍රීවරුන් වන සම්මු ආරියවංශ,චානක මාදුගොඩ , නලින් හේවගේ යන මහත්වරුන් සහ  ඉස්ලාමීය ඉදිරිපත් වීමේ කමිටුවේ සභාපති අබ්දුල් කාදර්  මොහොමඩ් රියාස් මහතා ඇතුළු ප්‍රදේශවාසීන්බොහෝ පිරිසක් එක් ව සිටියහ.