(රන්න - චන්ද්‍රසේන ගමගේ)

තිස්සමහාරාම වීරවිල ප්‍රදේශයේදී විදේශීය යුවලක් සතු ගමන් මලු කිහිපයක් පැහැර ගෙන පලා ගිය බවට සැක කෙරෙන පුද්ගලයන් දෙදෙනෙකු තංගල්ල කොට්ඨාශයේ අපරාධ විමර්ශන අංහයේ නිලධාරීන් විසින් අද (07) දින මාතරදී අත්අඩංගුවට ගෙන තිබේ.

අත්අඩංගුවට පත්ව ඇත්තේ මාතර පදිංචිකරුවෙකු හා බෙලිඅත්ත බෙලිගල්ල ප්‍රදේශයේ පදිංචිකරුවෙකු  බව පොලීසිය කියයි.

ඉකුත් නොවැම්බර් මස 26 වැනි දින ඇල්ල නගරයේදී බ්‍රිතාන්‍ය ජාතිකයෙකු හා ඔහුගේ බිරිඳ සමග මිතුරු වී ඇති  අත්අඩංගුවට පත් සැකකරුවන් දෙදෙනා ඇල්ල ප්‍රදේශයේ සිට කතරගම බලා විදේශීය යුවල සමග ගමන් කරන අතරතුරදී මෙම ගමන් මලු පැහැරගෙන ගොස් ඇතැයි පොලීසිය පවසයි.

විදේශීය යුවල සමග මොටර් රථයෙන් වීරවිලට පැමිණ ඇති සැකකරුවන් දෙදෙනා මෝටර්රථයේ කාර්මික දෝෂයක් ඇතැයි පවසා විදේශීය යුවල වාහනයෙන් බස්සවා ඇති බවත් අනතුරුව සැක කරුවන් වාහනයෙන් පලා ගොස් ඇති බවත් පොලීසිය කියයි.

විදේශීය යුවල සතු ගමන් බලපත්‍ර, බැංකු කාඩ්පත්, පරිඝණක උපකරණ හා කැමරාද, ඔවුන්ගේ ඇඳුම් පැළඳුම්ද ගමන්මලු  වල තිබී ඇත. විදේශීය යුවල සිද්ධිය වීරවිල පොලීසියට දැනුම්දීමෙන්  අනතුරුව තංගල්ල කොට්ඨාශයේ අපරාධ විමර්ශන අංශයේ නිලධාරීහු පරීක්ෂණ පවත්වා විදේශීය යුවලගෙන් පැහැර ගත් භාණ්ඩවලින් කොටසක් ඉකුත් 28 දින ඇඹිලිපිටිය ප්‍රදේශයේ හෝටලයක තිබී සොයාගෙන තිබේ. ඉන්අනතුරුව මෙම සැකකරුවන් දෙදෙනා පොලීසිය විසින් අත්අඩංගුවට ගෙන තිබේ.

අත් අඩංගුවට පත් සැක කරුවන් දෙදෙනා අද (07) තිස්සමහාරාම මහෙස්ත්‍රාත් අධිකරණයට ඉදිරිපත් කිරීමට නියමිතය.