(දයාරත්න ඇඹෝගම)

සිය වැටුප ජීවිතාන්තය තෙක් ලබාදෙන ලෙස ඉල්ලා ආබාධිත රණවිරුවන් කොටුව දුම්රිය ස්ථානයේ ඉදිරිපිට පවත්වන උද්ඝෝෂණයට සහාය ලබාදීමේ අරමුණෙන් අනුරාධපුර ආබාධිත රණවිරුවෝ සහ ඔවුන්ගේ ඥාතීහු පිරිසක් සෙනසුරාදා (21) දින පස්වරුවේදී අනුරාධපුර නව බස්නැවතුම්පළ ඉදිරිපිට  උද්ඝෝෂණයක නිරතවූහ.

මෙම උද්ඝෝෂණයට එක්ව සිටි අනුරාධපුර ශස්මික ලක්මාල් මහතා මෙසේ පැවසීය.

‘‘වසර ගණනාවක් තිස්සේ අපේ රටේ පැවැති යුද්ධය අවසන් කිරීමට මෙම රණවිරුවන් තම තරුණ කාලය කැපකළා. ඒ විතරක් නොවෙයි ඔවුන් තමන්ගේ අවයව පවා පරිත්‍යාග කළා. අපි ඉල්ලා සිටින්නේ ඔවුන්ට ඔවුන්ගේ වැටුප ජීවිතාන්තය දක්වා ලබාදෙන ලෙසයි.

මේ සඳහා ජනාධිපතිතුමා මණ්ඩල සංදේශයක් ඉදිරිපත් කළත් මුදල් අමාත්‍යවරයා ඊට විරුද්ධ බව පෙන්වූවා. අපි හැමෝගේම ඉල්ලිම මේ රණවිරුවන්ගේ ඉල්ලීම් ලබාදෙන්න කියන එකයි. අද ඔවුන් නොසිටියා නම් ජීවිත් වීමට රටත් ඉතුරු වෙන්නේ නෑ‘‘ යැයි පැවසීය.