(ශාන්ත ප්‍රදීප් කුමාර කුලරත්න)
 
කොට්ටාව, කටුකුරුන්ද ප්‍රදේශයේ තෙමහල් ගොඩනැගිල්ලක පවත්වාගෙන ගිය මෙට්ට කර්මාන්ත ශාලාවක අද(08) ඇති වූ ගින්නකින් එම කම්හල සම්පූර්ණයෙන් ගිනි ගෙන විනාශ වී ඇතැයි පොලිසිය කියයි.
 
ගින්න හටගත් අවස්ථාවේ එහි තෙවන මහලේ පුද්ගලයකු සිට ඇති බවත්, ඔහු මෙට්ට කිහිපයක් පොළවට විසි කර ඒ මතට පැන දිවිබේරාගෙන ඇති බවත් පැවසේ.
 
එම පුද්ගලයාගේ දකුණු අතට හානි සිදුවී ඇති අතර, හෝමාගම මූලික රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා  කොළඹ ජාතික රෝහලට ඇතුළත් කර ඇත.
 
කොට්ටාව මහනගර සභාවට අයත් ගිනි නිවන රථ 3ක් එහි පැමිණ ගින්න සම්පූර්ණයෙන් පාලනය කළ බව පොලිසිය කියයි.
 
ගින්න හේතුවෙන් යාබද දුරකථන සහ විදුලි රැහැන්වලට දැඩි හානි සිදුව තිබිණි. ගින්නෙන් සිදුවූ අලාභය මෙතෙක් ගණන් බලා නොමැත.
 
කොට්ටාව පොලිසිය පරීක්ෂණ පවත්වයි.