(අප්සරා යෝසිත් විජේසූරිය)
 
රත්නපුරයේ ගංජා අලෙවි කිරීමේ ජාවරමක ප්‍රධාන සැකකරු යැයි සැකකරන පුද්ගලයෙකු කේරළ ගංජා කිලෝග්‍රෑම් 6ක් ග්‍රෑම් 900ක්  සමඟ රත්නපුර මාරපන පහලවෙල ප්‍රදේශයේ නිවසකදී අද(14) අත්ඩංගුවට ගත් බව රත්නපුර පොලිසිය පවසයි.
 
සැකකරුගේ ගෙවත්තේ මෙම කේරළ ගංජා තොගයෙන් කොටසක් ප්ලාස්ටික් නල පද්ධති, ඇසුරුම්වල බහා තිබූ බවත්, තවත් කොටසක් ආනයනය කළ පාර්සලයක තිබූ බවත් පොලිසියේ ඉහළ නිලධාරියෙක් පැවසුවේය.
 
මේවා රත්නපුර පොලිසිය කළ වැටලීමකදී අත්අඩංගුවට ගත් වැඩිම කේරළ ගංජා තොගය බවත් එම නිලධාරියා ප්‍රකාශ කළේය. මෙම ගංජා කොළඹ ප්‍රදේශයේ පුදගලයෙකුගෙන් ලද ඒවා බවට පොලිසියට තොරතුරු හෙළි වී ඇත.
 
මැතිවරණ කාල සීමාවේදී සූක්‍ෂම ලෙස අලෙවිය පිණිස සූදානම් කර තිබූ ගංජා තොගයක් බවට පොලිසිය  සැකකරයි.
 
සැකකරු රත්නපුර, මාරපන, ඇලපාත, රත්නපුර මහජන පොළ, ගැටන්ගම වැනි ප්‍රදේශ ඉලක්කගත කරමින් කාලයක් තිස්සේ කේරළ ගංජා අලෙවි කර ඇතිබවට පොලිස් පරීක්‍ෂණවලදී  තොරතුරු ලැබී ඇතැයි පොලිසිය කියයි.
 
පාර්සලයේ තිබූ කේරළ ගංජා තොගය දවටන ලද ඇසුරුම  ඉන්දියාවේ භාවිත වන භාෂාවකින් මුද්‍රිත පුවත්පතක පිටු බවද,  කේරළයේ මුද්‍රිත පුවත්පතක පිටු බවද පොලිසිය සැකකරයි.
 
සැකකරු අධිකරණයට ඉදිරිපත් කිරීමට නියමිතය.