(චන්ද්‍රසේන ගමගේ)
 
කිරම වල්ගම්මුල්ල මහා විද්‍යාලයේ පාසල් සිසුවකුගේ පියකු එහි ගුරුවරයකුට ඊයේ(07) පාසල තුළදීම පහරදීමේ සිද්ධියට විරෝධය දක්වමින් එම විදුහලේ ගුරුවරු අද(08) උද්ගෝෂණයක නිරතවූහ.

ඊයේ 10වැනි වසරේ හා 11 වැනි වසරේ සිසුන් දෙපිරිසක් අතර ඇති වූ සුළු ගැටුමක් පාලනය කිරීමට ගිය එම ගුරුවරයා සිසුන් කිහිපදෙනෙකුට දඬුවම් දුන් බවත්, ඊට උරණ වූ මවුවරු දෙදෙනෙක් හා පියෙකු පාසල තුළට පැමිණ ඉගැන්වීමේ කටයුතුවල යෙදී සිටි ගුරුවරයාට පුටුවකින් පහර දී තුවාල කළ බවත් ඔවුහු පැවසූහ.

පහර කෑමට ලක්වූ ගුරුවරයා එවලේම රෝහල් ගත කළ බවත් මේ වන විටත් කිරම ප්‍රාදේශීය රෝහලේ ප්‍රතිකාර ගනිමින් සිටින බවත් ගුරුවරු කීහ.

මවුවරු දෙදෙනෙක් හා පියෙකු අසභ්‍ය වචනයෙන් බැණ තමන්ට පහර දුන් බවත් මෙම සිද්ධිය දැක තම පන්ති කාමරයේ සිටි සිසු දරුවන්ද භීතියට පත්ව කෑ ගසන්නට වු බවත් පහරකෑමට ලක් වූ පී. ඩබ්ලිව් ගමගේ මහතා පැවසීය.
 
සිද්ධියට සම්බන්ධ එක් සැකකරුවෙකු වලස්මුල්ල පොලීසිය අත්අඩංගුවට ගෙන ඇති බවත් ප්‍රදේශයේ සාමය ආරක්ෂා කිරීම සදහා පාසැලේ ගුරුවරුන් හා දෙමාපියන් සමග පොලිස් ස්ථානාධිපතිවරයා අද (08) දහවල් සාකච්ඡාවක් ආරම්භ කළ බවත් පොලීසිය පවසයි.
අද දිනයේදි සියලු ඉගැන්වීමේ කටයුතුවලින් ගුරුවරුන් බැහැරව සිටින බවද ගුරුවරු පැවසූහ.