(රංජිත් රාජපක්ෂ)                 

 කාසල්රි ජලාශයේ පාවෙමින් තිබූ බිළිඳෙකුගේ මළසිරුරක් අද (17) සොයාගත් බව හැටන් පොලිසිය පවසයි.

හැටන් සිට කාසල්රි ජලාශයට ප්‍රධාන වශයෙන් ජලය ගලා බසිනා දික්ඔය ඇළ කාසල්රී ජලාශයට එක් වන ස්ථානය වන දික්ඔය වනරාජා වත්ත ප්‍රදේශයේ මෙම බිළිඳු සිරුර පාවෙමින් තිබී හමුවී ඇත.

කාසල්රී ජලාශයේ ධීවර කටයුතු වල නියැලි සිටින ධීවරයන් විසින් ජලාශයේ පාවෙමින් තිබූ බිළිඳු මළසිරුර දැක ඒ පිළිබඳව හැටන් පොලිසියට දැනුම් දී ඇත.

උපන් විගසම බිළිඳාගේ මළ සිරුර දික්ඔය ඇළට දමන්නට ඇති බවත්, පසුගිය දින කිහිපයකින් සිරුර කාසල්රී ජලාශයට ගසාගෙන එන්නට ඇති බව සිරුර සම්බන්ධයෙන් පරික්ෂණ පවත්වන හැටන් පොලිසිය පවසයි.

බිළිඳාගේ සිරුර සම්බන්ධයෙන් මහෙස්ත්‍රාත් පරීක්ෂණයෙන් පසු සිරුර පශ්චාත් මරණ පරීක්ෂණය සදහා දික්ඔය මූලික රෝහලේ අධිකරණ වෛද්‍යවරිය වෙත ඉදිරිපත් කරන බව හැටන් පොලිසිය පවසයි.