(එස් .ඩී.කොඩිකාර )
 
කල් ඉකුත් වූ ඖෂධ විකිණීම සඳහා ප්‍රදර්ශනය කළ කොටපොළ ප්‍රදේශයේ  ඖෂධ වෙළඳසැල් හිමියකුට මොරවක මහේස්ත්‍රාත් ශෂිකා මිතුනා ආරච්චි  මෙනවිය රුපියල් 100,000 දඩයක් ගෙවන ලෙස අද (13)  නියම කළේය.

එසේ දඩ නියම වූයේ දෙනියාය පාර, කොටපොළ පදිංචි  හේවගේ  චමින්ද සඳමාල් නැමැත්තෙකු හටය.
 
මාතර දිස්ත්‍රික් සෞඛ්‍ය සේවා අධ්‍යක්ෂ කාර්යාලයේ  ආහාර හා ඖෂධ පරීක්ෂකවරුන් කොටපොළ ප්‍රදේශයේ  පසුගිය 3 වැනිදා  සිදුකළ ඖෂධ වෙළඳසැල් පරීක්ෂාවකදී මොහුට එරෙහිව මොරවක මහේස්ත්‍රාත් අධිකරණයේ නඩු පවරා තිබු අතර  ආහාර හා ඖෂධ පරීක්ෂක ජී.කේ.ඒ. ගොඩකන්ද මහතා අධිකරණයට පැමිණිල්ල ගොනු කරන ලදී.
 
මාතර දිස්ත්‍රික් සෞඛ්‍ය සේවා අධ්‍යක්ෂක කාර්යාලයේ  අධ්‍යක්ෂ  වෛද්‍ය උපාලි  කරුණාරත්න මහතාගේ උපදෙස් පරිදි ආහාර හා ඖෂධ පරීක්ෂකවරුන් වන ජී.කේ.ඒ. ගොඩකන්ද, වයි.වී. ද සිල්වා යන මහත්වරුන් මෙම වැටලීම සිදු කෙරිණි.