(නිශාන්ත කුමාර)
ඉල්ලීම් කිහිපයක් මුල්කරගනිමින් සමස්ත ලංකා ගොවිජන සම්මේලනය හා කන්දකැටිය වාරිමාර්ග කොට්ඨාසයට අයත් බදුලු ඔය ව්‍යාපාරයේ ගොවි එකමුතුව එක්ව සංවිධානය කළ උද්ඝෝෂණයක් අද (22 ) කන්දැටිය, කඳපොත්තාව වෙල්යායේදී පැවැත්විණ.
පසුගිය කාලයේ පැවති දැඩි නියඟයෙන් විනාශයට පත් ව්‍යාපාරයෙහි වගාවන්ට වන්දි ලබාගැනීම, ජලය සැපයීම සඳහා නිසි ලෙස වාරිමාර්ග පද්ධතියක් ඉදිකර ගැනීම හා යෝජිත රනැල්ල වැව ඉදිකරවා ගැනීම ඇතුළු ඉල්ලීම් කිහිපයක් මුල් කරගනිමින් මෙම උද්ඝෝෂණය පැවැත්විණි.
සමස්ත ලංකා ගොවිජන සම්මේලනයේ විධායක සභික සුදත් බලගල්ල මහතාගේ ප්‍රධානත්වයෙන් පැවති උද්ඝෝෂණයට කන්දකැටිය ප්‍රාදේශීය සභාවේ මහජන නියෝජිතවරු ඇතුළු එම ව්‍යාපාරයේ ගොවීහු 100කට ආසන්න පිරිසක් සහභාගී වූහ.
එම පිරිස පැයකට ආසන්න කාලයක් උද්ඝෝෂණයේ නිරත වූහ.
මෙම උද්ඝෝෂණය බදුලුඔය ව්‍යාපාරය නිවැරදි මාවතකට ගැනීම වෙනුවෙන් ආරම්භ කරන අරගලයේ මුල් පියවරක් බවත් ඉදිරි දින 10ක් තුළ මේ සම්බන්ධයෙන් නිසි ප්‍රතිචාර නොලදහොත් කන්දකැටිය නගරය වටලා දැවැන්ත උද්ඝෝෂණයක් කරන බවත් ඔවුහු පැවසූහ.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
