(සිතුම් චතුරංග)
            
වවුනියාව,  ඕමන්ත පැරණි හමුදා මාර්ග බාධකය අසළ ඉඩමක තිබී බිම් බෝම්බ 8ක් අද(16) සොයාගත් බව  ඕමන්ත පොලිසිය පවසයි.

ප‍්‍රදේශවාසියකු වගාකටයුත්තක් සඳහා ඉඩම පවිත‍්‍ර කිරීමේදී බිම්බෝම්බ හමුවී ඇති බව පොලිසිය සඳහන් කරයි.
            
බිම්බෝම්බ හමුවූ ප‍්‍රදේශය කොටි ත‍්‍රස්තවාදීන්ගේ බලප‍්‍රදේශයක් ලෙස පැවති අතර ආරක්ෂක හමුදා ඉලක්ක කර පහරදීම සඳහා මෙම බිම්බෝම්බ රැගෙනඑන්නට ඇති බව පොලිසිය සැක පළකරයි.
            
අදාළ ස්ථානයේ තිබී හමුවූ බිම්බෝම්බ කිහිපයක් දිරාගොස් තිබූ බවද පොලිසිය පවසයි.

සොයාගත් බිම්බෝම්බ වවුනියාව මහේස්ත‍්‍රාත් අධිකරණ නියෝග යටතේ පොලිස් විශේෂ කාර්ය බලකාය විසින් නිෂ්ක‍්‍රීය කිරීමට නියමිතය.

මෙම ඉඩම තුළ තවදුරටත් පුපුරණ ද්‍රව්‍ය පවතීද යන්න සොයා විමර්ශන කරන බව පොලිසිය කියයි.