(පාලිත ආරියවංශ)

ඌව පළාතේ 6 වැනි පළාත් සභාවේ නිල කාලය අද (8)  මධ්‍යම රාත්‍රී 12.00 ට අවසන් වෙයි.

ඉකුත් වසර 5 ක  පළාත් සභා කාලය තුළ ආණ්ඩුකාරවරු 5 දෙනෙක් හා ප්‍රධාන අමාත්‍යවරු ‍තිදෙනෙක් යටතේ මෙම පළාත් සභාව ක්‍රියාත්මක විය.

දෙමුහුන්  පාලනයක් ඇති පළාත් සභාවක් ලෙසද ඇමැති මණ්ඩලයක් නැතිව මාසයයි දින හතක කාලයක්  මහ ඇමැතිවරයා  පමණක්  සිටි පළාත් සභාවක් ලෙසද එම කාලයෙන් පසු ඇමතිවරු තිදෙනෙක් පත් කළද එක් ඇමැතිවරයකුගේ අඩුවක් ඇතිව කලක් පවත්වාගෙන ගිය පළාත් සභවක්  ලෙසද කලක් විපක්ෂනායකයෙක් නැතිව ක්‍රියාත්මක  වූ පළාත් සභාවක් ලෙසද මෙය ඉතිහාසයට එක්වී තිබේ.  

දිවයිනේ අනෙක් පළාත් සභා සියල්ල මීට පෙර විසුරුවා හරින ලද නමුත් ඌව පළාත් සභාව පමණක්  අද (8) දක්වා ක්‍රියාත්මක විය.

ඉකුත් පළාත් සභා මැතිවරණ ප්‍රතිඵල  අනුව මන්ත්‍රී  ධූර 34 න් ප්‍රසාද මන්ත්‍රී ධූර 2ක් සමඟ මන්ත්‍රී ධූර 19 ක් සන්ධානයට හිමිවිය. එක්සත් ජාතික පක්ෂයට මන්ත්‍රී ධූර 13 ක්ද  ජනතා විමුක්ති පෙරමුණට මන්ත්‍රී ධූර 2ක් ද හිමිවිය.

ශෂින්ද්‍ර රාජපක්ෂ , හරින් ප්‍රනාන්දු  යන මහත්වරුන්ගෙන් පසු 6 වන ඌව පළාත් සභාවේ මහ ඇමැතිවරයා වූ  චාමර සම්පත් දසනායක මහතා වසර 4 ක කාලයක් එම ධුරයේ කටයුතු කළේය .