(පුෂ්පකුමාර මල්ලවආරච්චි) 


දඩගමුව ප්‍රදේශයේ අවන්හලක් අසල දී ගිනි අවියකින් අහසට වෙඩි තබා  ජනතාව භීතියට පත්කළ බව කියන ව්‍යාපාරිකයකු හා සගයකු සැකපිට අත්අඩංගුවට ගත් බව වේයන්ගොඩ පොලිසිය කියයි.

මෙසේ අත්අඩංගුවට ගෙන ඇත්තේ කලගෙඩිහේන කුරුදුවත්ත ප්‍රදේශයේ ව්‍යාපාරිකයකු හා ඔහු සමඟ පැමිණි බව කියන පුද්ගලයකු බව පොලිසිය කියයි.

මෙම ව්‍යාපාරිකයා නවීන පන්නයේ රියකින් අවන්හල අසලට පැමිණ මිලි මිටර් නවයේ ගිනි අවියකින් අහසට වෙඩි 8 ක් තබා ඇති බව මුලික පොලිස්  පරීක්ෂනයේ දී හෙළි වී ඇත.

සිද්ධිය පිළිබඳව පැමිණිල්ල ලද පසු ක්‍රියාත්මක වූ පොලිසිය සැකකරුවන්  දෙදෙනා මිලි මීටර් නවයේ ගිනි අවිය ජීව උණ්ඩ  දෙකක් හිස්කොපු 8 ක් සමඟ ව්‍යාපාරිකයා පැමිණි බව කියන නවීන පන්නයේ රථය ද පොලිස් බාරයට ගෙන ඇත.

අත්අඩංගුවට ගත් ගිනි අවියේ අංකය අපහැදිලි බව කියන පොලිසිය එය ව්‍යාපාරිකයාට ලැබුණු  ආකාරය හෙළිකර ගැනිමට ද පියවර ගන්නා බව පොලිසිය පවසයි.

සැකකරුවන් අද (27) අත්තනගල්ල අධිකරණයට  ඉදිරිපත්  කිරීමට නියමිතය.