(බිමල් ශ්‍යාමන් ජයසිංහ)
 
කොන්ත්‍රාත් ක්‍රමයට මිනිස් ඝාතන සිදුකරන සංවිධානාත්මක අපරාධ කල්ලියක පුද්ගලයන් 4 දෙනෙකු ගිනි අවි, අත්බෝම්බ සහ තියුණු ආයුධ රැගෙන මෝටර් රථයකින් ගමන් කරමින් සිටියදී පිළියන්දල දම්පේ ප්‍රදේශයේදී අත්අඩංගුවට ගත් බව පිළියන්දල පොලීසිය කියයි.

අත්අඩංගුවට පත්වූවන් අතර හිටපු හමුදා සෙබළෙකුද වන බව පොලීසිය කියයි.

එම පුද්ගලයන් සමග ගිනි අවියක්, ජීව උණ්ඩ 12ක්, අත් බෝම්බයක් සහ කිනිසි 2ක් පොලිස් භාරයට ගෙන ඇත.

මෙම පුද්ගලයන් සිව්දෙනාගෙන් දෙදෙනෙකු ඉකුත් ජනවාරි මස පිළියන්දල ප්‍රදේශයේ සිදුවූ පුද්ගල ඝාතනයක ප්‍රධාන සැකකරුවන් බව පොලීසිය කියයි.

එම ඝාතනයෙන් පසු ඔවුන් දෙදෙනා ඩුබායි වෙත පලාගොස් මීට මසකට හා දින 2කට පෙර මෙරටට පැමිණි අය බව පොලිසිය කියයි.

මොවුන් මහාපරිමාණ මත්ද්‍රව්‍ය ජාවාරම්කරුවකු වන රත්මලාන අංජු නැමැත්තාගේ ගෝල බාලයින් බවද කියයි.

අත්අඩංගුවට ගත් සැකකරුවෝ කැලණිය, පෑලියගොඩ, මාතර සහ වැලිගම පදිංචිකරුවෝ ය.