(ඩී.ජී.සුගතපාල)
 
නීති විරෝධීව නොසැලකිලිමත් ලෙස විදුලි රැහැන් ඇද පුද්ගලයෙකු  මරණයට පත්කිරීමේ චෝදනාව යටතේ අත්අඩංගුවට ගෙන අධිකරණයට ඉදිරිපත් කරන ලද තේ ඉඩම් හිමියෙකු 26 වන දින දක්වා රක්ෂිත බන්ධනාගාර ගත කිරීමට ගාල්ල අතිරේක මහේස්ත්‍රාත් පවිත්‍රා සංජිවනි පතිරණ මහත්මිය නියෝග කළාය.
 
මෙසේ රිමාන්ඩ් බන්ධනාගාර ගත කරනු ලැබුවේ පත්තුව ආරච්චි අමිල උදයංග නමැති  ඉමදුව කෝඹල ප්‍රදේශයේ තේ ඉඩම් හිමියෙකි.
 
විදුලි සැර වැදිමෙන් මියගොස් ඇත්තේ නාගොඩ තලගස්වල වත්තේ පදිංචිකරුවෙකු වන  බාල ක්‍රිෂ්ණන් දිනේශ් නමැති 30 හැවිරිදි පුද්ගලයෙකි.
 
මියගිය පුද්ගලයා සහ තවත් තිදෙනෙකු පළමු වරට මෙම වත්තේ වැඩට ඉකුත් 11වනදින උදෑසන පැමිණ උදේ සේවක නිවාසයේ නතරව තේ ගස් කප්පාදු කිරීම සඳහා පිහිය මැදීමට තේ පැල තවාන අසළට ගොස් තිබේ. තවාන සොරුන්ගෙන් සහ ඌරන්ගෙන් ආරක්ෂා කර ගැනීම සඳහා ඇද තිබූ විදුලි කම්බියක පැටලි විදුලි සැර වැදීමෙන් මොහු මියගොස් ඇත.