(නිමල කොඩිතුවක්කු)

යුරෝපා සංගමය ජී. එස්. පී ප්ලස් බදු සහනය 2023 දක්වා ලබාදී ඇත්තේ පසුගිය එක්සත් ජාතික පෙරමුණු රජය සමයේ ඇතිකරගත් ගිවිසුමකට අනුව බව පාර්ලිමේන්තු මන්ත‍්‍රී හර්ෂ ද සිල්වා මහතා අද (20) පැවසීය.

වත්මන් ආණ්ඩුව පවසන පරිදි ජී. එස්. පී ප්ලස් බදු සහනය එක්වර ලබාදීමක් සිදුව නොමැති බවත් පසුගිය රජය හා ඇතිකරගත් එකඟතාවයන් මත මෙම බදු සහනය 2023 වසර තෙක් මෙරටට හිමිවන බවත් ඔහු සඳහන් කළේය.

ජී. එස්. පී ප්ලස් බදු සහනය යළි ලබාගැනීම තම රජයේ ප‍්‍රධානතම ඉලක්කයක් බවත් ඒ වෙනුවෙන් තමන් ඇතුළු පිරිසක් බොහෝ කැපකිරිම් සිදු කළ බවත්  මන්ත‍්‍රීවරයා පැවසීය.

මෙරටට ජී. එස්. පී ප්ලස් බදු සහනය ලබාදීම යුරෝපා සංගමය ප‍්‍රතික්ෂේප කර තිබූ බවත් සඳහන් කළ මන්ත‍්‍රීවරයා එම සහනය ලබා ගැනීමට තම රජයට හැකිවීම විශාල ජයග‍්‍රහණයක් බවත් සඳහන් කළේය.

ජී. එස්. පී ප්ලස් බදු සහනය ලබා දීමට පෙර යුරෝපා පාර්ලිමේන්තුව ඡන්ද විමසීමක් සිදු කළ බවත් එහිදී ඡන්ද 400% ජයගෙන  බදු සහනය ලබා ගැනීමට පසුගිය රජයට හැකිවූ බවත් ඔහු කියා සිටියේය.

ජී. එස්. පී ප්ලස් බදු සහනය සමඟ මත්ස්‍ය තහනම ඉවත් කිරීම මෙන්ම භාණ්ඩ 6000ක් සඳහා බදු සහන හිමිවීම ආර්ථිකයට විශාල පිටුවහලක් වූ බවත් ඔහු කීවේය.

පසුගිය රාජපක්ෂ පාලන සමයේ දී ජී. එස්. පී ප්ලස් බදු සහනය ප‍්‍රතික්ෂේප කළ බවත් එහි වාසිය බංගලාදේශය ඇතුළු රටවල් ලබාගනිමින් ඔවුන් විශාල ආර්ථික දියුණවක් ලැබූ බවත් මන්ත‍්‍රීවරයා සඳහන් කළේය.

වත්මන් ආණ්ඩුව පවසන පරිදි යුරෝපා සංගම් තානාපතිවරයකුට හෝ නිලධාරියකුට හෝ ජී. එස්. පී ප්ලස් බදු සහනය ලබාදීමට නොහැකි බවත් එය යුරෝපා පාර්ලිමේන්තු සංගමයේ පූර්ණ එකඟතාවයෙන් සිදුවන්නක්  බවත් හර්ෂ ද සිල්වා මහතා වැඩිදුරටත් පැවසීය.