(මනෝප‍්‍රිය ගුණසේකර)

බලපත‍්‍රයක් නොමැතිව අලි පැටවකු ලඟ තබා ගැනීම සම්බන්ධයෙන් වැඩතහනමකට ලක්වී සිටින කොළඹ හිටපු අතිරේක මහෙස්ත‍්‍රාත් තිළිණ ගමගේ මහතා ඇතුලු විත්තිකරුවන් සිව්දෙනෙකුට එරෙහිව නීතීපතිවරයා කොළඹ මහාධිකරණය හමුවේ අද (19) නඩු පැවරුවේය.

වැඩතහනමකට ලක්වී සිටින හිටපු මහෙස්ත‍්‍රාත් තිළිණ ගමගේ මහතාට අමතරව ‘සකුරා’ නමැති අලි පැටවාගේ හිමිකරු බව කියන පෑස්සුම්කරුවනකුට, වනජීවී දෙපාර්තමෙන්තුවේ සහකාර අධ්‍යක්‍ෂවරයකුට සහ එම දෙපාර්තමෙන්තුවේ අලි ඇතුන් ලියාපදිංචි අංශය බාරව සිටි ලිපිකාරිනියකට එරෙහිව නීතීපතිවරයා මෙලෙස නඩු පවරා ඇත.

වැඩතහනමකට ලක්වී සිටින හිටපු මහෙස්ත‍්‍රාත්වරයකුට එරෙහි මෙම සිද්ධියට එරෙහිව නඩු පැවරිය යුතු බවට නීතීපති, ජනාධිපති නීතීඥ දප්පුල ද ලිවේරා මහතා ගත් තීරණයකට අනුව මෙම විත්තිකරුවන්ට එරෙහිව නඩු පැවරීමට පියවර ගත් බව නීතීපතිවරයාගේ සම්බන්ධීකරණ නිලධාරිනී, ජ්‍යෙෂ්ඨ රජයේ නීතීඥ නිශාරා ජයරත්න මෙනවිය පැවසුවාය.

මීට පෙර අවස්ථාවකදී අලි ජාවාරම්කරුවකු බව කියන සමරප්පුලිගේ නිරාජ් රොෂාන් හෙවත් අලි රෝෂාන් නමැත්තා ඇතුලු විත්තිකරුවන්ට එරෙහිව නීතීපතිවරයා විසින් විශේෂ ත‍්‍රිපුද්ගල මහාධිකරණ විනිසුරු මඩුල්ලක් හමුවේ නඩුවක් පවරා ඇත.

වැඩතහනමකට ලක්වී සිටින හිටපු මහෙස්ත‍්‍රාත් තිළිණ ගමගේ මහතාට අමතරව ‘සකුරා’ නමැති අලි පැටවාගේ හිමිකරු බව කියන පෑස්සුම්කරුවකු වන චන්ද්‍රරත්න බණ්ඩාර යටවර, වනජීවී දෙපාර්තමෙන්තුවේ අලි ඇතුන් ලියාපදිංචි අංශය බාරව සිටි ලිපිකාරිනියක වන එච්. පි‍්‍රයංකා සංජීවනී, වනජීවී දෙපාර්තමෙන්තුවේ සහකාර අධ්‍යක්‍ෂ පැස්කුවල් ෆොන්සේකාලාගේ උපාලි පද්මසිරි යන මහත්වරුන්ට එරෙහිව නීතීපතිවරයා නඩු පවරා ඇත.

2008 නොවැම්බර් 06 වැනිදාත් 2015 මැයි 18 වැනිදාත් අතර කාලයේ මීගොඩ ගොඩගමුවේදී නිසි බලපත‍්‍රයක් නොමැතිව පොදු දේපලක් වන අලියෙකු ලඟ තබා ගැනීම සඳහා කුමන්ත‍්‍රණය කිරීම, ඒ අනුව වනයෙන් අල්ලා ගන්නා ලද ‘සකුරා’ වශ්‍යයෙන් හඳුන්වනු ලැබූ අලි පැටවකු ලඟ තබා ගැනීම ඒ සඳහා අධාර අනුබලදීම ඇතුලු චෝදනා 25ක් යටතේ විත්තිකරුවන්ට එරෙහිව නීතීපතිවරයා විසින් නඩු පවරා ඇත.

විත්තිකරුවන්ට එරෙහි චෝදනා ඔප්පු කිරීම සඳහා පැමිණිල්ල වෙනුවෙන් සාක්කිකරුවන් 25 දෙනෙකු හා ලේඛන 08ක් ඉදිරිපත් කිරීමට අපේක්‍ෂා කරන බව නීතීපතිවරයා අධිකරණයට දැනුම් දී ඇත.

වනජීවී ඇමති වසන්ත සේනානායක මහතා විසින් අපරාධ පරීක්‍ෂණ දෙපාර්තමෙන්තුවට කරන ලද පැමිණිල්ලකට අනුව මෙම සිද්ධිය සම්බන්ධයෙන් විමර්ශන ආරම්භ කරන ලදී.

පෑස්සුම්කරුවකු වන චන්ද්‍රරත්න බණ්ඩාර යටවර නමැත්තා ‘සකුරා’ නමැති අලි පැටවා තමාට අයත් බව පවසන බවත් වෘත්තියෙන් පෑස්සුම්කරුවකුට රුපියල් ලක්‍ෂ 70ක පමණ වටිනා අලි පැටවකු ලැබීමට ඇති හැකියාව ප‍්‍රශ්න සහගත බවත් 2008 සැප්තැම්බර් 02 වැනිදා මෙම අලි පැටවා ලියාපදිංචි කිරීමට ඇයැදුම් පත‍්‍රයක් ඉදිරිපත් කොට ඇතැත් වනජීවී දෙපාර්තමෙන්තුව ඒ සම්බන්ධ ගොනුව විවෘත කොට ඇත්තේ ඊට වසර 04කට පසු 2012 වසරේදී බව හෙළි වන්නේ යැයි සඳහන් කරන නීතීපතිවරයා මෙම අලි පැටවා සම්බන්ධයෙන් විගණකාධිපති දෙපාර්තමෙන්තුව සිදුකළ විමර්ශනයකින් අනතුරුව අලි පැටවා වනාන්තරයකින් අල්ලාගෙන ව්‍යාජ ලේඛන භාවිතා කොට ලියාපදිංචි කොට ඇති බව හෙළි වන බවට වැඩිදුරටත් සඳහන් කොට ඇත.

මෙම අලි පැටවා පෑස්සුම්කරුවකු වන චන්ද්‍රරත්න බණ්ඩාර යටවර නමැත්තා සන්තකයේ සිට නැති බවත් වැඩතහනමකට ලක්වී සිටින හිටපු මහෙස්ත‍්‍රාත් තිළිණ ගමගේ මහතා ව්‍යාජ ලේඛන භාවිතා කරමින් අලි පැටවාගේ සන්තකය ගැනීමට ඉල්ලුම් පත ඉදිරිපත් කොට ඇත්තේ වනජීවී දෙපාර්තමෙන්තුවේ නිලධාරීන් සමඟ කළ කුමන්ත‍්‍රණයකට අනුව බව පැහැදිලි වන බවද සඳහන් කොට ඇත.