27 වැනිදා අලුයම 5 ට සීගිරිය විවෘත කරයි
(කාංචන කුමාර ආරියදාස)
ලෝක සංචාරක දිනය නිමිතිකර ගෙන මේ මස 27 වන දින සීගිරිය නැරඹීම සඳහා අලුයම 5 ට සංචාරකයන්ට විවෘත කිරීමට මධ්‍යම සංස්කෘතික අරමුදල තීරණය කර තිබේ .
බොහෝ සංචාරකයන් අලුයම් කාලයේ පිදුරංගල ගල ට නැග ඉරපායන දසුන නරඹන බවත් ඊට සමගාමීව සීගිරි පව්ව මත හිඳ ඉර පායන දසුන් නැරඹීම සඳහා සංචාරකයන්ට මෙදින අවස්ථාව ලබා දීම මෙහි අරමුණ බව මධ්‍යම සංස්කෘතික අරමුදල සීගිරියේ ව්‍යාපෘති කළමනාකරු මේජර් අනුර නිශාන්ත මහතා පැවසීය.
සාමාන්‍ය පරිදි සීගිරිය නැරඹීම සඳහා ප්‍රවේශ පත්‍ර නිකුත් කරනු ලබන්නේ උදෑසන හතේ සිට පස්වරු 5.00 දක්වා කාලසීමාව තුළදීය . ලෝක සංචාරක දිනය දා දෙස් විදෙස් සංචාරකයන්ට අලුයම 5 සිට සීගිරි පව්ව මතට නැඟීම සඳහා ප්‍රවේශ පත්‍ර නිකුත් කිරීම සිදු කරන බවද හෙතෙම සඳහන් කළේය.
ලෝක සංචාරක දිනය සැමරීම සඳහා සීගිරිය අවට සුද්ධ පවිත්‍ර කිරීමේ ශ්‍රමදානයක් ද මෙදිනට සංවිධානය කොට තිබේ . ඊට අමතරව දිළිඳු පවුලකට නිවාසයක් ඉදි කර එය පරිත්‍යාග කිරීම ද සීගිරිය පොලිසිය මධ්‍යම සංස්කෘතික අරමුදල සහ රාජ්‍ය ආයතන කීපයක් එක්ව සිදු කිරීමට නියමිත බවද ඒ මහතා සඳහන් කළේය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
