( තිළිණි ද සිල්වා සහ රංජන් කටුගම්පොළ )

පාර්ලිමේන්තුව විසුරුවා හරිමින් ජනාධිපතිවරයා නිකුත් කළ ගැසට් නිවේදනය ඉවත් කර ගැනීමට ආණ්ඩුක්‍රම ව්‍යවස්ථාවෙන් ජනාධිපතිවරයාට නීතිමය ප්‍රතිපාදන සලසා දී නැතැයි නීතිපතිවරයා අද (26) ශ්‍රේෂ්ඨාධිකරණය හමුවේ කියා සිටියාය.

ජනාධිපතිවරයාට ආණ්ඩුක්‍රම ව්‍යවස්ථාවෙන්  බලය ඇත්තේ විසුරුවා හළ පළාත් සභාවක් නැවත කැදවීම සඳහා පමණක් යැයිද නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් ,ජනාධිපති නීතීඥ ඉන්දිකා දේමුණි ද සිල්වා මහත්මිය පංච පුද්ගල විනිසුරු මඩුල්ල හමුවේ පෙන්වා දුන්නාය.

එබැවින් පෙත්සම්කරුවන් ඉල්ලා සිටින සහන ලබා දිය නොහැකි බැවින් මෙම පෙත්සම් විභාගයට නොගෙන නිෂ්ප්‍රභ කරන්නැයිද නීතිපති වෙනුවෙන් අතිරේක සොලිසිටර් ජනරාල්වරිය කියා සිටියාය.

ජුනි මස 20 වනදා මහ මැතිවරණය පැවැත්වීම සහ ජනාධිපතිවරයා විසින් පාර්ලිමේන්තුව විසුරුවා හරිමින් නිකුත් කළ ගැසට් නිවේදන අභියෝගයට ලක් කරමින් තිබෙන මූලික අයිතිවාසිකම් පෙත්සම අද(26) අඛණ්ඩව  හය වන දිනටත් ශ්‍රේෂ්ඨාධිකරණය හමුවේ සලකා බැලීම ඇරඹුණි.

අගවිනිසුරු ජයන්ත ජයසූරිය, බුවනෙක අලුවිහාරේ , සිසිර ද ආබෲ,  ප්‍රියන්ත ජයවර්ධන සහ විජිත් මළල්ගොඩ යන මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඬුල්ල ඉදිරියෙහි මෙම පෙත්සම් සලකා බැලේ.

නීතිපතිවරයා වෙනුවෙන් අතිරේක සොලිසිටර් ජෙනරාල් ඉන්දිකා දේවමුනි ද සිල්වා මහත්මිය අද වැඩිදුරටත් අධිකරණය හමුවේ කියා සිටියේ  පාර්ලිමේන්තු මැතිවරණ පනතට අනුව රජයේ නිවාඩු දිනවල නාම යෝජනා පත්‍ර භාර ගැනීම සදහා නීතිමය බාධාවන් නොමැති බව විවිධ නඩු තීන්දු උපුටා දක්වමින් පෙන්වා දුන්නේය.

පෙත්සම්කරුවන් ඉල්ලා සිටින පරිදි මහ මැතිවරණය සඳහා නාමයෝජනා පත්‍ර භාර ගැනීම නීති විරෝධී බවට තීන්දු කරනු ලැබුවොත් අලුතින් නාම යෝජනා පත්‍ර කැඳවීමට පාර්ලිමේන්තු මැතිවරණ පනත යටතේ ප්‍රතිපාදන සලසා නොමැති බව ද ඇය පෙන්වා දුන්නේය.