නව ආණ්ඩුවේ දැක්ම යථාර්ථයක් බවට පත් කරගැනීම සඳහා ජපානයේ පූර්ණ සහයෝගය හිමිවන බව ජපාන විදේශ කටයුතු අමාත්‍ය ටොෂිමිට්සු මොටෙගි මහතා අද (13) පැවැසීය.

තෙදින නිල සංචාරයක් සඳහා මෙරටට පැමිණ සිටින ජපාන විදේශ අමාත්‍ය ටොෂිමිට්සු මොටෙගි මහතා සහ විදේශ සබඳතා අමාත්‍ය දිනේෂ් ගුණවර්ධන මහතා අතර හමුවක් කොළඹ විදේශ අමාත්‍යාංශයේ දී අද (13) පැවැත්විණි.

ශ්‍රී ලංකාව සහ ජපානය අතර තිබෙන ද්විපාර්ශ්වීය සබඳතා ශක්තිමත් කිරීමටත් දෙරට අතර තිබෙන සබඳතා තවදුරටත් පුළුල් කිරීමටත් ජපාන රජය පූර්ණ සහයෝගය දෙන බව ද ජපාන විදේශ කටයුතු අමාත්‍යවරයා එහිදි සහතික විය.

දීර්ඝ කාලයක් මුළුල්ලේ ශ්‍රී ලංකාව සහ ජපානය අතර තිබෙන අන්‍යෝන්‍ය සබඳතා සිහිපත් කළ ජපාන විදේශ කටයුතු අමාත්‍යවරයා ජපානයේ මූල්‍ය ප්‍රතිපාදනවලින් ශ්‍රී ලංකාවේ කෙරෙන ව්‍යාපෘතිවල වැදගත්කම ද මෙහිදි සිහිපත් කළේය.

තිරසර සංවර්ධනය සහ වර්ධනය කරා යන ගමනේදී ජපානය ශ්‍රී ලංකාවට අඛණ්ඩව සහාය දක්වන බව ද අමාත්‍ය මොටෙගි මහතා ප්‍රකාශ කළේය.

ශ්‍රී ලංකාවේ සමාජ හා ආර්ථික සංවර්ධනයට ජපානය දක්වන අඛණ්ඩ සහාය සම්බන්ධයෙන් විදේශ සබඳතා දිනේෂ් ගුණවර්ධන මහතා මෙහිදි ජපාන විදේශ අමාත්‍යවරයාට කෘතඥතාව පළ කළේය. සියලු ශ්‍රී ලාංකිකයන්ගේ ආරක්ෂාව තහවුරු කිරීමටත් රටේ සියලු දෙනාට සෞභාග්‍යය ගෙන ඒමටත් නව ආණ්ඩුව බලාපොරොත්තු වන මෙහිදි සඳහන් කළ ගුණවර්ධන මහතා නව ආණ්ඩුවේ මාර්ග දැක්ම පිළිබඳව ද ජපාන විදේශ අමාත්‍යවරයා දැනුවත් කළේය.

ඉක්මනින්ම ජපානයේ සංචාරයක නිරත වන්නැයි ද මෙහිදි අමාත්‍ය මොටෙගි මහතා විදේශ සබඳතා අමාත්‍ය දිනේෂ් ගුණවර්ධන මහතාට ආරාධනයක් කළේය.

දෙරටේ සබඳතා සහ සහයෝගීතාව වැඩි කළ හැකි ආකාර සම්බන්ධයෙන් අමාත්‍යවරුන් දෙදෙනා මෙහිදි වැඩිදුරටත් සාකච්ඡා පැවැත්වූහ.

ජපානයේ ශ්‍රී ලංකා තානාපති අකිරා සුගියාමා, වැඩබලන විදේශ ලේකම් අහ්මද් ඒ. ජවාද් ජපාන දූත පිරිසේ නියෝජිතයන්, විදේශ සබඳතා අමාත්‍යාංශයේ නිලධාරීන් ඇතුළු පිරිසක් මෙම අවස්ථාවට එක්වූහ.    

055