(මනෝප‍්‍රිය ගුණසේකර)
 
මාධ්‍යවේදී කීත් නොයාර් මහතාට පහරදීමේ සිද්ධිය සම්බන්ධ සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙස නීතිපතිවරයා අපරාධ පරීක්‍ෂණ දෙපාර්තමේන්තුවේ අධ්‍යක්‍ෂවරයාට නියම කොට මාස දෙකක කාලයක් ගතවී ඇතත් මේ දක්වා එම විමර්ශනයන්ට අදාළව ඔවුන් කටයුතු නොකිරීම පිළිබඳව විමර්ශනයක් පවත්වන ලෙස නීතීපතිවරයා වැඩබලන පොලිස්පතිවරයාට නියම කොට ඇත.
 
අපරාධ පරීක්‍ෂණ දෙපාර්තමෙන්තුවේ විමර්ශන කටයුතු වල ප‍්‍රගතිය මේ වන තෙක් වාර්තා නොකිරීම පිළිබඳව ඇති කණගාටුදායක තත්වය පිළිබඳවද නීතීපතිවරයා වැඩබලන පොලිස්පතිවරයාගේ අවධානයට යොමු කොට ඇති බවද නීතීපතිවරයාගේ සම්බන්ධීකරණ නිලධාරිණිය ජ්‍යෙෂ්ඨ රජයේ නීතීඥ නිශාරා ජයරත්න මෙනවිය දැනුම් දුන්නාය.
 
මාධ්‍යවේදී කීත් නොයාර් මහතාට පහරදීමේ සිද්ධිය සම්බන්ධයෙන් හමුදා බුද්ධි අංශ වලට සම්බන්ධ බව කියන සීවලී බුලත්වත්ත ඇතුළු  දෙදෙනෙකු සම්බන්ධයෙන් ගතයුතු පියවරයන් පිළිබඳව නීතීපතිවරයා විසින් මීට පෙර අවස්ථාවකදී අපරාධ පරීක්‍ෂණ දෙපාර්තමෙන්තුවට දැනුම් දී තිබිණි.
   
මීට මාස දෙකක කාලයකට පෙර එලෙස උපදෙස් ලබාදී ඇතත් මේ වන තෙක් ඒ සම්බන්ධයෙන් නිසි විමර්ශනයක් නොකිරීම හෝ සිදුකරන ලද විමර්ශන පිළිබදව නීතිපතිවරයා දැනුවත් නොකිරීම සම්බන්ධයෙන් අවධානය යොමු කරමින් මෙලෙස දැනුම් දී ඇත.
 
තමන් විසින් දෙන ලද උපදෙස් වලට අනුව මේ වන තෙක් ගන්නා ලද පියවරයන් පිළිබඳව මෙන්ම මේ සම්බන්ධයෙන්  සිදුකිරීමට බලාපොරොත්තු වන විමර්ශන කටයුතු මොනවාද? කොපමණ කාලයකින් එම විමර්ශන කටයුතු අවසන් කිරීමට බලාපොරොත්තු වන්නේද යන්න පිළිබඳවද දැනුම් දෙන ලෙස නීතීපතිවරයා විසින් වැඩබලන පොලිස්පතිවරයාට දැනුම් දුන් බවද නීතීපතිවරයාගේ සම්බන්ධීකරණ නිලධාරිණිය ජ්‍යෙෂ්ඨ රජයේ නීතීඥ නිශාරා ජයරත්න මෙනවිය දැනුම් දුන්නාය.