( අංජුල මහික වීරරත්න ) 

එක්සත් ජාතික පක්ෂය ප්‍රමුඛ පෙරමුණෙන් ජනාධිපති අපේක්ෂකයා කවුදැයි එකට වාඩි වී සාකච්ඡා  කර ඉක්මනින් තීරණයක්  දෙන ලෙස  එක්සත්ජාතික පක්ෂ නායකයින්ගෙන් සහ නියෝජ්‍ය නායකයින්ගෙන් ඉල්ලා සිටීමට එක්සත් ජාතික පක්ෂ පසු පෙළ මන්ත්‍රී කණ්ඩායම තීරණය කර ඇත.
 
එක්සත්  ජාතික පක්ෂ නායක අගමැති රනිල් වික්‍රමසිංහ මහතාගේ සහ නියෝජ්‍ය නායක  නිවාස හා ඉදිකිරීම් අමාත්‍ය සජිත් ප්‍රේමදාස මහතාගෙන්  මෙම ඉල්ලීම කිරීම සඳහා  එජාප පසුපෙළ මන්ත්‍රීවරු 26 දෙනාම ඒකමතිකව තීරණයකට එළැඹි බව පාර්ලිමේන්තු මන්ත්‍රී හෙක්ටර් අප්පුහාමී මහතා ලංකාදීපයට පැවසීය.
 
 ජනාධිපති අපේක්ෂකයා කවුරුන්දැයි  යන්න ඉතා කඩිනමින් තීන්දු කරන ලෙසට වන ඉල්ලීම  මේ වන විටත් පක්ෂ නායක අග්‍රාමාත්‍ය රනිල් වික්‍රමසිංහ  මහතා හමු වී ඉදිරිපත් කර  කර ඇති බවත් ඔහුගෙන් ඊට යහපත් ප්‍රතිචාරයක් ලැබුණු බවත්  ඔහු සඳහන් කළේය.
 
 මේ අතර එක්සත් ජාතික පක්ෂයේ පසුපෙළ මන්ත්‍රීවරුවන් සහ නියෝජ්‍ය නායක අමාත්‍ය සජිත් ප්‍රේමදාස මහතා අතර හමුවක් අද (20) රාත්‍රියේදී පැවැත්වීමට ද නියමිතය.
 
 එක්සත් ජාතික පක්ෂයේ අපේක්ෂකයා කවුරුන්දැයි  දැන ගැනීමට පාක්ෂිකයින් පුල පුලා බලා සිටින බව කී මන්ත්‍රීවරයා එළියේ කටකතාවලට  ඉඩ නොතබා ඉතා කඩිනමින් තීරණයක් ගත යුතුව ඇතැයිද සඳහන් කළේය.