(නිමල කොඩිතුවක්කු)

20 වැනි සංශෝධනයට පක්ෂව ඡන්දය ප්‍රකාශ කළ සමගි ජන බලවේගයේ මන්ත්‍රීවරුන් පාර්ලිමේන්තු කණ්ඩායමෙන් නෙරපීමට තීරණය කළ බව එහි මහලේකම් රංජිත් මද්දුමබණ්ඩාර මහතා පැවැසීය. විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පාර්ලිමේන්තු කමිටු ශාලා අංක දෙකෙහි පැවති සමගි ජන බලවේගය පාර්ලිමේන්තු කණ්ඩායම් රැස්වීමේදී මෙම තීන්දුව ගත් බවද ඔහු සඳහන් කළේය.

සමගි ජනබලවේගයේ මන්ත්‍රී කණ්ඩායම් රැස්වීමේ තීන්දුවට පටහැනිව යමින්, විසිවැනි සංශෝධනයට පක්ෂව සහයෝගය දුන් පිරිසට එරෙහිව නීත්‍යානුකූලව විනය පියවර ගැනීමටද එහිදී තීන්දු කළ බවත් මහලේකම්වරයා පැවසීය. එමෙන්ම පාර්ලිමේන්තුවේ අසුන් පැනවීමේ ක්‍රියාවලිය තුල එම පිරිස් සමගි ජනබලවේගයේ කණ්ඩායමින් වෙන්ව අසුන් පැනවීම උදෙසා කතානායකවරයා දැනුවත් කිරීමට එහිදී තීන්දු කළ බවත් රංජිත් මද්දුමබණ්ඩාර මහතා සඳහන් කළේය.

කොරෝනා උවදුර සමනය වූ සැනින් පක්ෂයේ  දීප ව්‍යාප්ත ප්‍රවර්ධන කටයුතු ආරම්භ කිරීමට එහිදී තීන්දු කළ බවද ඔහු පැවසීය.

ආණ්ඩුවේ වැඩපිළිවෙළට එරෙහිව සමගි ජනබලවේගය ශක්තිමත් ජනතාවාදී බලවේගයක් බවට පත් කිරීමට අවශ්‍ය කටයුතු සිදු කරන බවත් ඔහු වැඩිදුරටත් සඳහන් කළේය.