( පුෂ්පකුමාර ජයරත්න )

තමන් වැනි මුස්ලිම් ජාතිකයකු ඓතිහාසික බෞද්ධ උරුමයන් පෙරටු කරගත් වයඹ වැනි ඓතිහාසික පළාතක ආණ්ඩුකාරවරයා ලෙස පත් කිරීම සමස්ත මුස්ලිම් ජාතින්ට කරන ලද ගෞරවයක් බව  වයඹ පළාත් නව ආණ්ඩුකාර ධූරයේ රාජකාරි කටයුතු ආරම්භ කරමින් ඒ.ජේ.එම්.මුසම්මිල් මහතා ප්‍රකාශ කළේය.

වයඹ පළාතට පත්වූ අභිනව ආණ්ඩුකාරවරයා පිළිගැනීමේ රාජ්‍ය උත්සවය වයඹ පළාත් සභා ශ්‍රවනාගාරයේ දී අද (2)  පැවැත්විණි.

නව තනතුරේ රාජකාරි කටයුතු ඇරැඹීමට ප්‍රථම වයඹ ආණ්ඩුකාර කාර්යාලයීය භූමියේ පිහිටි ඉපැරැණි ජයශ්‍රී මහා බෝධින්වහන්සේගේ බෝධි ශාඛාව වෙත ගිය මුසම්මිල් මහතා එම බෝධින් වහන්සේට නෙළුම් මල් වට්ටියකින් පුෂ්පෝපහාර දැක්වීය .

පසුව ආණ්ඩුකාර කාර්යාලයීය භූමියේම කොටසක පිහිටි ඉපැරණි දළදා මාලිගයේ නටඹුන් ඇතුළු එම ස්ථනයේ ප්‍රදර්ශනයට තබා ඇති වයඹ  ඉපැරණි නටඹුන් නැරඹීමට ගියේය.

එහිදී වැඩි දුරටත් අදහස් දැක්වූ වයඹ ආණ්ඩුකාර මුසම්මිල් මහතා මෙසේ ද ප්‍රකාශ කළේය .

ජනාධිපති ගෝඨාභය රාජපක්ෂ මහතා ජනාධිපති ධූරයේ දිවුරුම් දීමෙන් පසුව මට කීවේ මුසම්මිල් මම ඔයාට බස්නාහිරටත් වඩා හොඳ පළාතක ආණ්ඩුකාර තනතුරක් දෙනවා කියලා. එහෙම කියලා මට දුන්නේ වයඹ පළාතේ ආණ්ඩුකාර තනතුරයි. වයඹ පළාත කියන්නේ මේ රටේ ප්‍රධාන ඉපැරැණි රාජධානි හතරකින් සමන්විත 90% ආසන්න ප්‍රමාණයක් බෞද්ධයන් ජීවත්වන ලංකාවේ වැඩිම විහාර පන්සල් මහානායක හාමුදුරුවරු නායක හාමුදුවරු වැඩිම පිරිසක් වාසය කරන පළාතක්.

වයඹට තියෙන බෞද්ධ උරුමය දිහා බැලුවාම බෞද්ධ ජනතාවට සහ භික්ෂූන් වහන්සේලාට මගේ පත්වීම ගැන සැකයක් ඇතිවීම සාධාරණයි. ඒ සැකය නැතිවෙන ආකාරයට මගේ තනතුරේ රාජකාරි කරන බවට මම පොරොන්දු වෙනවා. ගලගොඩඅත්තේ ඥානසාර හාමුදුරුවෝ පවා මා පිළිබඳව විශාල විශ්වාසයක් ගොඩනඟලා තිබෙනවා . මුස්ලිම් ජාතිකයකු වන මට ඒක විශාල ආඩම්බරයක්. මට අද බෞද්ධ ආගමානුකූලව වැඩ බාරගන්න කටයුතු සැලැස්වීම පිළිබඳවත් ගෞරවයනීය සංඝරත්නයට මගේ ප්‍රණාමය පුද කරනවා .

ආණ්ඩුකාර කාර්යාලය තිබෙන ස්ථානය ඓතිහාසික වශයෙන් වැදගත් ස්ථානයක් නිසා මම මගේ රාජකාරි කටයුතු සඳහා වයඹ පළාත් සභාවේ ප්‍රධාන අමාත්‍යාංශය භාවිතා කිරීමට තීරණය කළා යැයිද මුසම්මිල් මහතා වැඩි දුරටත් සඳහන් කළේය.