(නිමන්ති රණසිංහ)
 
මහර බන්ධනාගාරයේ උසස් නිලධාරියෙකුගේ දුරකතන ඇමැතුමකින් වූ නියෝගයක් මත බන්ධනාගාරයට පැමිණි පුද්ගලයකු, රැගෙන ආ කුකුළු මස් ව්‍යාංජනයක් සහිත භාජනයක තිබු නවීන පන්නයේ ජංගම දුරකතන දෙකක් සහ දුම්කොල කුඩු සහිත පාර්සලයක් සම්බන්ධයෙන් බුද්ධි අංශ විමර්ශනයක් ආරම්භ කර ඇතැයි බන්ධනාගාර මාධ්‍ය ප‍්‍රකාශක බන්ධනාගාර කොමසාරිස් (පාලන) චන්දන ඒකකනායක මහතා පැවසීය.
 
කොරෝනා වසංගත තත්ත්වයත් සමගම පිටතින් පැමිණෙන අමුත්තන්ට රැදවියන් මුණගැසීම හෝ කෑම ලබාදීම තහනම් කර ඇති අවස්ථාවක මෙකී පුද්ගලයාට මහර බන්ධනාගාරයට පැමිණීමට අවසර ලබාදුන් බන්ධනාගාර ඉහළ නිලධාරීන් සම්බන්ධයෙන් ද මෙම විමර්ශනය ආරම්භ කල බවද ඔහු සදහන් කළේය.
 
ඊයේ (12)  පස්වරු 4.00ට පමණ මහර බන්ධනාගරයට පැමිණ ඇති මෙම බාහිර පුද්ගලයාට බන්ධනාගාරය තුළ යාමට අවසර ලබා දී ඇත්තේ එහි උසස් නිලධාරියෙකුගේ දුරකතන ඇමතුමකින් වූ නියෝගයකින් අනුව බවත්, එම පුද්ගලයාට බන්ධනාගාරය තුළට යාමට අවසර ලබා දිය නොහැකි බවට එහි ගේට්ටුවේ සිටි නිලධාරීන් ප‍්‍රකාශ කරන අවස්ථාවේදී ඔහු කුකුළු මස් ව්‍යාංජනය සහිත භාජනය එහි දමා පලා ගොස් ඇති බවත් හෙතෙම පැවසීය.