(ඩයනා උදයංගනී)

        ඉතාලිය, චීනය හා ඉරානය යන රටවල සිට පැමිණි පුද්ගලයින් 570 දෙනෙකු මඩකලපුව හා කන්දකාඩු නිරෝධායන මධ්‍යස්ථානවල මේ වන විට රඳවා සිටින බව සෞඛ්‍ය සේවා අධ්‍යක්‍ෂ ජනරාල් විශේෂඥ වෛද්‍ය අනිල් ජාසිංහ මහතා පැවසීය.

එම රටවල සිට පැමිණෙන පිරිස් ගුවන් තොටුපලට පැමිණි වහාම නිරෝධායන මධ්‍යස්ථාන වෙත රැගෙන යා නොහැකි බව කී අනිල් ජාසිංහ මහතා ගුවන් තොටුපල කටයුතු හා පෘෂ්ඨීය විෂබීජ හරණය ආදී කටයුතු වෙනුවෙන් යම් කාලයක් වැයවන බව ද සඳහන් කළේය.

ඉන්පසු සුඛෝපභෝගී බස් රථ මගින් නිරෝධායන මධ්‍යස්ථාන වෙත රැගෙන ගොස් දින 14 ක් නේවාසිකව නිරෝධායනය කෙරෙන බව කී සෞඛ්‍ය සේවා අධ්‍යක්‍ෂ ජනරාල්වරයා කොරෝනා වයිරස අවදානමෙන් ලෝකය මිදෙන තුරු දිගින් දිගටම මෙම කාර්යය කිරීමට සිදුවන බව ද කීවේය.

මෙම නිරෝධායන කටයුත්තට අමතරව චීනය ආදී රටවල සිට පැමිණි 4443 දෙනකු ඔවුන් සිටින ස්ථානවලදීම දින 14ක් යනතුරු පසුවිපරමකට ලක්කිරීමේ කිරීමේ කටයුතු සෞඛ්‍ය වෛද්‍ය නිලධාරීන්ගේ අධීක්‍ෂණය යටතේ මහජන සෞඛ්‍ය පරීක්‍ෂකවරුන් විසින් සිදුකරමින් සිටින බව ද හෙතෙම සඳහන් කළේය.

සෞඛ්‍ය සේවා අධ්‍යක්‍ෂ ජනරාල්වරයා මේ බව පැවසුවේ සෞඛ්‍ය අමාත්‍යාංශයේදී අද (11) පැවති මාධ්‍ය හමුවක් අමතමිනි.