නාසා ආයතනය විසින් අඟහරු වෙත යවන ලද ප්‍රිසවරන්ස් රෝවර් යානය අද (19) අලුයම අඟහරු මතට සාර්ථක ලෙස පතිත කර තිබේ.

අඟහරුගේ සමකයට ආසන්න ජෙසෙරෝ නමින් හඳුන්වන ගැඹුරු ආවාටයකට එම යානය ගොඩ බැස්වූ බව ඇමරිකානු බලධාරීහු පවසති.

යානය 2020 වසරේ ජූලි 30 වනදා අඟහරු බලා ගමන් ඇරඹීය. රෝද 6කින් සමන්විත මෙම රෝවරය ඉදිරි වසර 6ක කාලය තුළ අඟහරු පෘෂ්ඨය මත කැණීම් සිදුකරමින් තොරතුරු ලබාදීමට නියමිත බව ද ඔවුහු පවසති. අඟහරු මත ජීවය පැවතියාද යන්නට සාක්ෂි සොයාගැනීමද මෙහෙයුමේ ප්‍රධාන අරමුණකි.

එම යානය අති නවීන ගවේෂණ උපකරණවලින් සමන්විත වන අතර කැමරා 20ක් මයික්‍රෆෝන දෙකක් හා ඩ්රෝන යානයක් සහිතය.

රෝවරය ගොඩබැස්වූ ජෙසෙරෝ ආවාටය අතීතයේ විලක් ලෙස පැවති ප්‍රදේශයක් බවට අනුමාන කරන ස්ථානයකි. පෘථිවියෙන් එපිට ග්‍රහලොවකදී පළමු වරට හෙලිකොප්ටරයක් පියාසර කරවීම, අඟහරු මත පළමු වරට ශබ්ද පටිගත කිරීම මෙම මෙහෙයුමේ විශේෂ ක්‍රියාකාරකම් අතර වෙයි.

ඇමරිකානු අභ්‍යවකාශ ඒජන්සිය මගින් අඟහරු වෙත ගොඩබස්වන ලද දෙවන රෝවරය මෙයයි.

පළමුවැන්න වන කියුරියෝසිටි රෝවරය 2012 වසරේදී අඟහරුගේ වෙනත් ආවාටයකට පතිත කරවන ලදී.

(බීබීසී ඇසුරිණි - 085)