(*** සුජිත් හේවාජුලිගේ)

පාර්ලිමේන්තුවට අලුතින් තේරීපත්වුණු මන්ත්‍රීවරුන් හැත්තෑ නව දෙනාට තීරුබදු රහිත වාහන බලපත්‍රය මුලින්ම ලබාදීමට අදහස් කර ඇතැයි රාජ්‍ය පරිපාලන හා කළමනාකරණ අමාත්‍යාංශ ආරංචි මාර්ගවලින් පැවැසේ.

සෙසු මන්ත්‍රීවරුන්ට තීරුබදු රහිත වාහන බලපත්‍රය ඉන් පසුව නිකුත් කෙරෙනු ඇත. මේ සම්බන්ධයෙන් රාජ්‍ය පරිපාලන හා කළමනාකරණ අමාත්‍යාංශයේ උසස් නිලධාරියකුගෙන් කළ විමසුමකදී ඔහු සඳහන් කළේ තීරුබදු රහිත වාහන බලපත්‍රය නිකුත් කිරීම සඳහා මන්ත්‍රීවරුන්ගේ වැටුප් වාර්තා හා අනෙකුත් තොරතුරු මේ දිනවල එක්රැස් කරගෙන යන බවයි.

පාර්ලිමේන්තුවට තේරී පත්වුණු මන්ත්‍රීවරුන් දෙසිය විසිපස් දෙනාටම මේ තීරුබදු රහිත වාහන බලපත්‍රය හිමිවෙයි. මන්ත්‍රීවරයෙකුට හිමිවන තීරුබදු රහිත වාහන බලපත්‍රයක වටිනාකම රුපියල් කෝටි දෙකකට ආසන්නය.

මෝටර් රථ ආනයනය අත්හිටුවා තිබෙන හෙයින් දැනට මෙරටට ගෙන්වා ඇති වාහනවලින් මන්ත්‍රීවරුන්ට තමන් අභිමත වාහන මිලදී ගැනීමට හැකිවනු ඇත. මෝටර් රථ ආනයන තහනම ඉවත් කළ පසුවද වාහන ගෙන්වා ගැනීමට අවස්ථාව ලැබෙන බව එම ආරංචි මාර්ග වැඩිදුරටත් සඳහන් කරයි.

මන්ත්‍රීවරුන්ට තීරුබදු රහිත වාහන බලපත්‍රය ලබාදීමට අදාළ කැබිනට් පත්‍රිකාව කැබිනට් මණ්‍ඩලයට ළඟදීම ඉදිරිපත් කිරීමට නියමිතය. මේ අතර පාර්ලිමේන්තුවට තේරීපත්වූ ඇතැම් මන්ත්‍රීවරුන් මහ මැතිවරණයට ඉදිරිපත්වූ අවස්ථාවේදී තීරුබදු රහිත වාහන බලපත්‍රය නොගන්නා බවට ප්‍රසිද්ධියේම ප්‍රකාශ කර තිබිණි.