(රොමේෂ් මධුෂංඛ)

බහුදින ධීවර යාත්‍රා මගින් මුහුදු ගිය උතුරු නැගෙනහිර ප්‍රදේශයන්හි ධීවරයින් 1500කට ආසන්න පිරිසකට ජනාධිපතිවරණයේදී සිය ඡන්දය ප්‍රකාශ කිරීමට නොහැකි වන බවත්, යම්කිසි ලියාපදිංචි කිරීමකට අනුව ඔවුන්ට ඡන්දය ප්‍රකාශ කළ හැකි ලෙස පියවරක් ගන්නා ලෙසත් ජාතික ධීවර සහයෝගිතා ව්‍යාපාරය මැතිවරණ කොමිසමෙන් ඉල්ලා සිටී.
 
රාජ්‍ය සේවකයින්ට වෙනත් දිනයක සිය ඡන්දය ප්‍රකාශ කිරීමට ලබාදෙන අයුරින් මෙම ධිවරයන්ටද එවැනි වැඩපිළිවෙළක් ක්‍රියාත්මත කරන ලෙස එම ව්‍යාපාරයේ කැඳවුම්කරු හර්මන් කුමාර මහතා පැවසුවේය.
 
ධීවර පවුල්වල ඡන්ද ප්‍රකාශන කටයුතු පිළිබඳව කළ විමසීමකදී හර්මන් කුමාර මහතා මේ බව පැවසීය. එහිදී ඔහු වැඩිදුරටත් මෙසේ පවසා සිටියේය.
 
‘මේ ධීවරයින්ට වෙන රැකියාවක් නැහැනේ. තියෙන්නේ ධීවර රැකියාව විතරයි. බහුදින යාත්‍රාවලින් මුහුදු ගමන් යන අය නැවත ගෙවල් වෙතට එන්නේ සතියකට දෙකකට විතර පසුවයි. මේ අය ඡන්දය නිසා නොයා ඉන්නෙත් නැහැ. එදාට එන්නත් බැහැ. උතුරේ එතරම් බහුදින ධීවර යාත්‍රා නොතිබුණත් නැගෙනහිර ධීවර යාත්‍රා විශාල ප්‍රමාණයක් තිබෙනවා. දවසකට ධීවර යාත්‍රා 200 ක් ගියත් එක යාත්‍රාවක ධීවරයින් පස්දෙනෙකු ගමන් ගත්තත් එතනම 1000ක් විතරයි. මේක ඒ ධීවරයින්ට කෙරෙන ලොකු අසාධාරණයක්” යැයිද කීය.