(එෆ්.අස්ලම්)

ආණ්ඩුවට එරෙහි විශ්වාසභංග යෝජනාව පරාජය කිරීම සඳහා ඡන්දය ප්‍රකාශ කිරීමට දෙමළ ජාතික සන්ධානය මීට සුළු මොහොතකට පෙර තීරණය කර තිබේ.

එම සන්ධානයේ නායක ආර්.සම්බන්ධන් මහතාගේ ප්‍රධානත්වයෙන් පාර්ලිමේන්තු සංකීරණයේ අද (11) සවස රැස්වූ පාර්ලිමේන්තු කණ්ඩායම් රැස්වීමේදී මෙම තීරණය ගත් බව එම සන්ධානයේ පාර්ලිමේන්තු මන්ත්‍රී ධර්මලිංගම් සිද්ධාර්ථන් මහතා ලංකාදීපයට පැවසීය.

දෙමළ ජාතික සන්ධානය නියෝජනය කරන පාර්ලිමේන්තු මන්ත්‍රීවරුන් 14 දෙනා අතර විවිධ අදහස් ගොඩනැගීම මත දෙමළ ජාතික සන්ධාන පාර්ලිමේන්තු කණ්ඩායමට අවස්ථා දෙකකදී රැස්වීමටද සිදුවිණි.

ඒ අනුව අද පස්වරු 2.00 ට දෙවන වර්ට රැස්වී දීර්ඝ සංවාදයකින් අනතුරුව ඒකමතික තීරණයක් වශයෙන් රජයට සහාය දැක්වීමට තීරණය කර ඇත.

ජනතා විමුක්ති පෙරමුණ විසින් ඉදිරිපත් කළ විශ්වාසභංගයට අදාල ඡන්ද විමසුම අද සවස සිදුකිරීමටද නියමිතව ඇත.