(ඩයනා උදයංගනී)

පාස්කු ඉරිදා ප‍්‍රහාරය සම්බන්ධයෙන් ගතයුතු සියලූ පියවර ගෙන තිබියදීත් පිටකොන්දක් නැති බව කියා තමාට චෝදනා කරන්නේ දේශපාලන න්‍යාය පත‍්‍ර අතේ තබාගත් අයයැයි ජනාධිපති මෛත‍්‍රීපාල සිරිසේන මහතා පැවසීය.

ප‍්‍රහාරයට මාස තුනක් පිරෙන අවස්ථාවේදී මේ සම්බන්ධ පරීක්‍ෂණ නිසලෙස නොකෙරී ඇතිබවට, නායකයින්ට පිට කොන්දක් නැති බවට හා නායකයින් ගෙදර යා යුතු බවට ප‍්‍රකාශයන් ඉදිරිපත් වී ඇතැයි කී ජනාධිපතිවරයා මැතිවරණයකින් දිනා බලයට ආ අය නිල කාලය ඉවර වූ පසු ගෙදර යා යුතු බවත් එය කිසිවෙක් කියන්නට උවමනා නැති බවත් සඳහන් කළේය.

අවශ්‍ය නම් නැවත මැතිවරණයකට මුහුණ දෙන බවද ජනාධිපති මෛත‍්‍රීපාල සිරිසේන මහතා පැවසීය.

තමන්ට හොඳ පිටකොන්දක් ඇති බව කී ජනාධිපතිවරයා එය 2015 ජනවාරි 8 වැනිදා මෙන්ම අගමැතිවරයා ඉවත් කර හිටපු ජනාධිපතිවරයාට අගමැතිධූරය ලබාදීම ඇතුළු අවස්ථා ගණනාවකදී ඔප්පු කර ඇතැයිද කීවේය.

ජනාධිපති මෛත‍්‍රීපාල සිරිසේන මහතා මේ බව පැවසුවේ කොළඹ සුගතදාස ගෘහස්ථ ක‍්‍රීඩාංගණයේදී අද (22) පැවති ‘සත්විරු අභිමන්’ රණවිරු ප‍්‍රතිලාභ ප‍්‍රදානෝත්සවයේ ප‍්‍රධාන ආරාධිතයා ලෙස එක්වෙමිනි

කිසිම ජනාධිපතිවරයෙක් නොකළ අයුරින් හිටපු ආණ්ඩුවේ දූෂණ වංචා මෙන්ම වත්මන් ආණ්ඩුවේ දූෂණ වංචා සෙවීමටද තමන් ජනාධිපති පරීක්‍ෂණ කොමිෂන් සභා පත්කළ බව ද ජනාධිපතිවරයා ප‍්‍රකාශ කළේය.

තමන් බලයේ සිටි වසර හතර හමාර පුරා සටන් කරන්නේ මත් ජාවාරම්කරුවන්, අපරාධකරුවන්, පාතාලයින්, ස්ත‍්‍රී දූෂකයින්, දුම්කොළ හා ඖෂධ සමාගම් ආදී අය සමඟය මෙන්ම දේශපාලනයේ දූෂිතයින්, හා පාතාලයින්ට විරුද්ධව ඒ බව කී ජනාධිපතිවරයා පිටකොන්ද ශක්තිමත් නැති නම් එසේ කළ නොහැකි බව ද කීවේය.

එසේ තිබියදීත් පිට කොන්දක් නැති බව කියමින් ජනාධිපතිවරයාට හා අගමැතිවරයාට නම් නොකියා චෝදනා කරන්නේ දේශපාලන න්‍යායපත‍්‍ර අතේ තියාගෙන බවද ජනාධිපති මෛත‍්‍රීපාල සිරිසේන මහතා පැවසීය.

යම් ප‍්‍රශ්නයක් තිබෙනවා නම්  ඕනෑම කෙනෙකු සමඟ විවෘතව මාධ්‍ය ඉදිරියේ සාකච්ඡා කිරීමට තමන් සූදානම් බව කී ජනාධිපතිවරයා ඇතැමුන් තමාට අපහාස, උපහාස, කරන්නේ තමන් දුප්පත් පවුලකින් ආ අයෙකු නිසා බවද කීවේය.

තමාට පෙර සිටි ජනාධිපතිවරුන්ට මෙවැනි චෝදනා කළේ නම් එසේ කළ අයගේ දේපළ පවා අහිමි වන බව කී ජනාධිපතිවරයා පෙර ජනාධිපතිවරුන්ට තිබූ බරපතල චෝදනා කිසිවක් තමාට එල්ල වී නැතැයිද කීවේය.

මෙම ප‍්‍රහාරය වළක්වා ගැනීමට නොහැකි වී ඇත්තේ හිටපු ආරක්‍ෂක ලේකම්වරයාගේ හා පොලිස්පතිවරයාගේ වරදින් බව මේ වන විට තහවුරු වී ඇතැයි කී ජනාධිපතිවරයා ඒ සම්බන්ධයෙන් අධිකරණය හා පරීක්‍ෂණ කෙරෙන කොමිෂන් සභා තුළ ස්වාධීන පරීක්‍ෂණයන් සිදුවන බව ද සඳහන් කළේය.

ඒ සම්බන්ධයෙන් කිසිවක් හංගා නැතැයි කී ජනාධිපතිවරයා සියල්ල විවෘත බව ද කීවේය.

කිසිවෙකුට හෝ අසාධාරණයක් වී ඇත්නම් ඔවුන්ට අධිකරණයට, අපරාධ පරීක්‍ෂණ දෙපාර්තමේන්තුවට හෝ පොලීසියට ගොස් කරුණු ඉදිරිපත් කළ හැකි බවද ජනාධිපති මෛත‍්‍රීපාල සිරිසේන මහතා ප‍්‍රකාශ කළේය.