(සිතුම් චතුරංග)
 

මුලතිව්, නයාරු ගුරුකන්ද පුරාණ රජමහා විහාරස්ථා‍නයේ ආරක්ෂාව සඳහා නව සීසීටීවී කැමරා පද්ධතියක් සවිකිරීමේදී අද (16) සවස මුලතිව් පොලිස් නිලධාරීන් එහි පැමිණ සවිකර තිබූ කැමරා සියල්ල ගලවාදමන ලෙසට  නියෝග කළ බව විහාරස්ථානයේ දායක සභාවේ නිලධාරියෙක් පැවසීය.
 
විවිධ අන්තවාදී පිරිස් විසින් විහාරය වෙත සිදුකරන බලපෑම් හා විහාරයේ ආරක්ෂාව සඳහා විහාරාධිපති පුජ්‍ය මිහිදුපුර රතනදේවකිත්ති නාහිමියන්ගේ අනුශාසනා පරිදි විහාරයේ ආවාස ගෙය ඇතුළු විහාර සීමාවේ මෙම කැමරා සවිකිරීම ආරම්භ කළ බව එම නිලධාරියා පැවසීය.
 
කැමරා සවිකරමින් සිටියදී පැමිණි පොලිස් නිලධාරීන් පන්සල භාරව සිටි තාවකාලික භාරකරු වෙත බලපෑම් කර සවිකළ කැමරාද ගලවා දමා ඇත.
 
සිද්ධියට පිළිබඳ අදහස් දැක්වූ ගුරුකන්ද පුරාණ රජමහ විහාරයේ තාවකාලික භාරකරුවූ කැළුම් බණ්ඩාර මහතා මෙසේ පැවසීය,
 
‘‘ලොකු හාමුදුරුවෝ පිරිවෙ‍නේ වැඩකට වැඩම කරලා ඉන්න හින්දා මම තමයි විහාර‍ය තාවකාලිකව බලා ගන්නේ. අපි කැමරා සවි කරමින් ඉන්නකොට මුලතිව් පොලිසියේ නිලධාරීන් පිරිසක් ආවා. ඇවිල්ලා කිව්වා පන්සලේ සීසීටීවී කැමරා සවි කරන්න බෑ කියලා. වහාම සවි කරපුවා ගලවන්න කියලා. මට කිව්වා ඔයා පන්සල බලාගන්නවානම් ඇවිල්ලා බලලා විතරක් යන්න කියලා.
 
දැන් විහාරයේ සවි කරපු කැමරා ටික ගලවලා තිබෙන්නේ. දෙමළ ජාතික සන්ධාන‍ය ඇතුළු පිරිසක් අපේ පන්සලේ කෝවිලක් තිබෙනවා කියලා විවිධ බලපෑම් කරනවා. ඒක හින්දා තමයි ලොකු හාමුදුරුවෝ පන්සලේ සීසීටීවී කැමරා සවි කරන්න කියලා කිව්වේ. ඒත් දැන් ඒකට පොලිසියත් බාධා කරනවා" යැයි වැඩිදුරටත් ඔහු වැඩිදුරටත් පැවසීය.
 
නඩු විභාගයත් අහෝසි වී තිබෙන අවස්ථාවක පූජා භූමියක සීසීටීවී කැමරා සවිකිරීමට නොදීම ගැටලු සහගත තත්වයක් බවත් මුලතිව් පොලිසිය දේශපාලඥයින්ගේ උපදෙස් මත මෙම විහාරස්ථානයට දිගින් දිගටම බලපෑම් සිදුකරන බවත් විහාරයේ දායක සභා ක්‍රියාකාරියෙක් පැවසීය.
 
මීට දින කිහිපයකට ඉහතදී විහාර භූමියේ පවතින ‍කෝවිලේ පූජාවක් වෙනුවෙන් පැමිණි දෙමළ ජාතික සන්ධාන හිටපු උතුරු පළාත් සභා මන්ත්‍රී ටී. රවිහරන් මහතා ඇතුළු පිරිසක්ද විහාරයේ භාරකරු වෙත තර්ජනය කළ බව විහාරස්ථ දායක සභාව වැඩිදුරටත් පැවසූහ.